Shillong, Jylliew 23
Ka Nongpiur Sports Club ka la ïoh ban rah ïa ka nam lahduh jong ka lympung ïalehkai 14th AS Khongphai Memorial Football Tournament 2024 hadien ba ka la lah ban pynliem noh ïa ka Umlyngka Sports Club ha ka final kaba la long ha ka sngi Saitjaiñ ha madan Nongumlong.
Haba phai sha ka jingïalehkai hapdeng kitei ki ar tylli ki Sports Club, ka la long kaba itynnad bad ïakhaid bha hynrei na baroh ar liang kim shym la lah satia ban pynkhih jar bad haduh ba kut ka por ruh kim shym la lah bad ha kaba la rai ban pynlong da ka jingïashut tie-breaker.
Ha kane ka jingïashut tie-breaker, ka Nongpyiur SC ka la lah ban pynliem noh da 4-3 kol ïa ka Umlyngka SC.
Ha kane ka lympung, ïa ka khusnam nongïalehkai ba khynnah tam la ïoh da u samla Mateishaphrang Kharlor na ka Nongumlong Sports Club bad u samla Lifarson Thawmuit na ka Nong-piur Sports Club, ïa ka nam Best Discipline Team la ïoh da ka Nongumlong SC bad ka nam Best Manager la ïoh da ka Umlyngka bad ïa ka nam Best Goalkeeper la ïoh da u Ronald Jyrwa na ka Umlyngka, ïa ka nam ‘Best Top Scorer’ la ïoh da u Rahul Sarkar na ka RIH FC (Lumpdeng) bad ïa ka nam ‘Best Player’ ka lympung ïalehkai la ïoh u da samla Andrews Tyngsong na ka Nongpiur SC.
Ka Nongpiur SC kaba dei ka lahduh ka la ïoh da ka song pisa 20 hajar tyngka ryngkat ka khusnam bad katba ka Umlyngka SC pat kaba la shah rem ha ka final ka la ïoh 10 hajar tyngka bad ka khusnam.
Ha ka sngi pynhap pyrda ïa kane ka lympung ïalehkai la wan ban sakhi lang da u MLA ka thaiñ u Bah Ronnie V Lyngdoh kum u kongsan lem bad u samla Eugeneson Lyngdoh kum u symbud kongsan ryngkat ka jingïadon lang kiba haïing hasem jong u AS Khongphai kumjuh ki nongkitkam jong ka Association bad kiwei kiwei.
