Shillong, Naiwieng 12
Ar ngut ki khlur ïalehkai siatkhnam kiba la mih-khmat teng ïa ka India ha ka Olympic, u Atanu Das bad ka Deepika Kumari, ki la wan shim bynta ha ka NTPC Senior National Archery Championship 2026 kaba la sdang ha ka sngi Palei ha madan Parade ha Umsawli, New Shillong.
Kine ki shi kurim kiba la mihkhmat na ka Petro-leum Sports Promotion Board (PSPB) ha ka recurve round, ki la pynpaw ïa ka jingitynnad ka nongbah Shillong namar ka long kaba pyngngad bad ka long kaba sngewtynnad ban ïashim bynta ha ki lympung ïalehkai ha kum kine ki jaka.
Ki la pynpaw ba kane ka jingwan shim bynta jong ki kam mut bad kin ïoh ban khur ïa ki takma, hynrei ka long ba kin sngewthuh ïalade haduh katno ki lah ban ïalehkai hashwa ba kin ïoh pat ka lad ban shim bynta shabar ri.
Watla ki dei kiba la mihkhmat teng ïa ka ri India ha ka Olympic, hynrei ki la pynpaw ba kam don jingïapher ban ïashim bynta lang bad kiwei pat ki nongïalehkai jong ka ri ha kane ka lympung namar baroh ki pyndonkam da kijuh ki ryntih bad u khnam ban siat.
“Watla nga la ïoh ban shim bynta ar sien ha ka Olympic, hynrei ka shong ha nga ba lada nga lah ban ïalehkai bha nga lah ban ïoh shim bynta sa ha kawei pat ka lympung. Kumba lada kiwei kiba dangshu sdang ban shim bynta ha kane ka lympung, lada ki trei shitom ka lad kan plie ïa ki ba kin ïoh rung wat shaduh ka Olympic,” la pynpaw u Atanu Das, uba la shim bynta ha ka Rio Olympic 2016 bad ha ka Tokyo Olympic kaba la long ha u 2021.
“Ha ka jingshisha ngam da khmih lynti eh ban khur takma ha kane ka lympung, hynrei ka jingwan shim bynta ha kane ka lympung ka long ban sngewthuh ïa ka rukom ïalehkai jong nga,” la ong ka Deepika, kaba la shim bynta saw sien ha ka Olympic ha London 2012, Rio de Janeiro 2016, Tokyo 2020 bad Paris 2024.
Kiwei pat ki nongïa-lehkai kiba la shim bynta tang ha ka Olympic, kiba la wan shim bynta ha kane ka nongbah ki long u Tarundeep Rai, ka Ankita Bhagat bad u Neeraj Chauhan.
