Amlarem, Naiwieng 12
Ka Sohkha Mission, Lurniang Club bad ka Lumpynngad YC ki la khur jingjop ha ka 3rd Division bad Super Division ba la pynïaid da ka Amlarem Sub-Divisional Sports Association (ASSA) ha ka sngi Palei ha Mini Stadium Ladjaplem, Amlarem.
Ha ka jingïalehkai jong ka 3rd Division, ka Sohkha Mission ka la pynliem ïa ka Larem Shyiap da 2-0 kol bad kane ka la wan lyngba ki kol ba la thep da u Kitbok Surong ha ka minit kaba 15 bad 24.
Ha ka jingïalehkai kaba bud hapdeng ka Moosakhia bad DK Umladkhur ki la ïasam mar shi poiñ hadien ba ki la ïakhaid mar 1-1 kol.
Ka DK Umladkhur ka la pynkhih jar nyngkong lyngba u Bitus Sumer ha ka minit kaba 15 jong ka kylla step, hynrei ka Moosakhia ka la pynphai kylla ha ka kylla miet lyngba u Rimiki Suting (52).
Ha kawei pat ka jingïalehkai, ka Lurniang Club ka la jop da 2-0 kol ïa ka Model Evergreen. Ïa kine la thep da u Baïakmenlang Lyngdoh ha ka minit kaba 55 bad u Shaniahlut Khyriem (58).
Haba phai sha ka jingïalehkai jong ka Super Division, ka Lum-pynngad YC ka la pynliem noh ïa ka Sohlawiat SCC da 2-1 kol.
Ha kane ka jingïakhun ka Lumpynngad ka la ïoh ban thep ar kol lyngba u Kindness Mukhim ha ka minit kaba 24 bad u Alphaious Pamblang (51), hynrei hashwa ban wai ka Sohlawiat ka la pynphai kylla lyngba u Fullme Khongïong (83).
