Shillong, Jylliew 23
U Wanbok L Mawphlang bad ka Marqueenless Ramsiej ki la rah ïa ka nam jop ha ka jingïakop mareh ba la tip kum ka 5th Shillong 10K Run ba la pynlong da ka Meghalaya State Olympic Association (MSOA) ha kane ka nongbah ha ka 22 tarik u Jylliew 2024.
Ka jingpynlong ïa kane ka jingïakop ka long kum shi bynta ban rakhe ïa ka International Olympic Day, ka ban long ha ka 23 tarik u Jylliew 2024 ban kynmaw ïa ka jingseng ïa ka International Olympic Committee ha u snem 1894.
U Wanbok u la khur ïa ka jingjop ha ka liang ki shynrang jong ka Open Men’s category bad ïa ka kyrdan ba ar la khur da u Iwelljohn Ramsiej bad balai da u Sainkupar Jyrwa.
Haba phai pat ha ka liang jong ki kynthei, ka Marqueenless ka la wan ba nyngkong, ba ar ka Balasiewdor Pathaw bad balai ka Ivanjilin Khongwir.
Ha ka liang kiba la 50 snem shaneng, u Bah Badon Tham u la ïai bat biang ïa ka nam lahduh kaba u la khur ha u snem 2023. Ïa ka kyrdan ba ar bad balai la khur da u Bah Swonding Mawlong bad Bah Laurence Pariong.
Ha ka liang jong ki kynthei kiba la palat 50 snem rta la jop da ka Kong Ralinda Marbaniang, ba ar ka Kong Smarless Marwein bad balai ka Kong Ibameri Shullai. I Kong Kmoin Wahlang ila wan ha ka kyrdan ba saw.
Kane ka jingïakop mareh ka la sdang na madan Polo, sha saw Furlong, BK Bajoria School, PGT College, Shillong Commerce College, Don Bosco Square, Laitumkhrah Police Point, Laitumkhrah Police Beat House, Fire Brigade, Dhankheti, Barik Point, Civil Hospital, State Central Library, Meghalaya Secretariat, Deputy Commissioner’s Office, Governor’s House, Nan Palok, jaka sah u Myntri Rangbah bad ban pynkut biang ha madan Polo.
Ha kane ka sngi la sam ruh ka khusnam da ka song pisa sha ki nongjop, kata ha ka kyrdan ba nyngkong, ba-ar bad balai, ha kaba u bad ka nongjop ki la khur 5 hajar tyngka, ba wan ba-ar ki la ïoh 3 hajar tyngka bad kiba wan ba lai ki la ïoh 2 hajar tyngka. Nalor kane, ki la don ruh ki consolation prizes na ka bynta kiba wan ba saw haduh ba hynriew bad la ai ruh ki khusnam kyrpang sha kito ki nongmareh kiba la tymmen.
Baroh ki nongmareh ki lah ban download ïa ki syrnod ïashim bynta ha kane ka jingïamreh lyngba ka website jong ka MSOA kata ka (https://meghalayaolympicassociation.com/) ha kine ki taïew ban wan.
