Shillong, Jylliew 25
Ka Austria ka la lah ban pynthikna na ka bynta ban jam sha ka pre-quarter final na ka Group-D jong ka Euro 2024 hadien ba ka la lah ban pynliem noh ïa ka Netherlands da 3-2 kol ha ka Sngi Ba-ar.
Kane ka la wan urlong lyngba ka kol kaba khatduh ba la thep da u rangïalehkai shapdeng ka Borussia Dortmund u Marcel Sabitzer na ka bynta ban pynlong ïa ka Austria ban jam sha ka kyrdan ba hakhlieh ryngkat bad 6 point na ki lai sien ïakhun.
Ha kane ka jingïa-khun kaba khatduh jong kane ka group, ka Austria ka la ïoh ei shi kol na ka daw ka jingbakla thep hi u rangïalehkai ka Netherlands u Donyell Malen ha ka minit kaba 6. Wat la kine ki kynhun ki la ïai bteng ïa ka jingïakhun, hynrei kim shym la lah ban thep kol haduh kaba kut jong ka kylla step.
Hadien ar minit ba la bteng biang ïa ka jingïakhun u Cody Gakpo u la lah ban pynphai kylla na ka bynta ka Netherlands na ka bynta ban ïakhad mar shi kol. Hynrei ka Austria ka la pynbud biang ïa ka kol kaba ar lyngba u Romano Schmid ha ka minit kaba 59.
Kane ka jingshah thep kol ka la pynlong ïa ki rangïalehkai ka Netherlands ban ïakhun tyngeh ha kaba u Memphis Depay u la lah ban pynphai kylla ha ka minit kaba 78. Kane ka jingïakhaid ka la pynlong ïa kine ki kynhun ban ïai bteng bad ïakhun tyngeh, bad dei ha ka minit kaba 80 u Marcel Sabitzer u la ïoh thep kol. Haduh kaba kut ka Netherlands kam shym la lah shuh ban pynphai bad ka la mad ïa ka jingshah rem.
Haba phai sha kawei pat ka jingïakhun jong kane kajuh ka group, ka Poland ka la ïakhaid mar 1-1 kol bad ka France. Kane ka jingïakhaid ka la pynlong ïa ka France ban ïoh rung sha ka pre-quarter final hadien ba ka la wan ba ar ryngkat bad 5 point na ki lai sien ïakhun.
Wat la kine ki kynhun kim shym la lah ban thep kol haduh kaba kut jong ka kylla step, hynrei ka France ka la ïoh ban pynkhih jar nyngkong eh lyngba ka penalty ba la shut da u Kylian Mbappe ha ka minit kaba 56. Hadien katto katne por ka Poland ka la lah ban pynïakhaid kylla lyngba u Robert Lewandowski ha ka minit kaba 79.
