Shillong, Risaw 28
Ka Nongkseh SS&CC ka la mad ïa ka jingshah rem ha ka Lakecity FC da 1-0 kol bad kane ka long ka sien kaba nyngkong eh ïa kane ka kynhun ïalehkai ka nongbah ban duh ïa ki lai poiñ ha ka Group-C jong ka lympung ïalehkai I-League 3, ha ka sngi Balang ha SSA Stadium.
Kane ka shi kol ka la wan urlong lyngba u Abhijit Tawhare ha ka minit kaba 58.
Ka Nongkseh kaba la hap ban ïalehkai tang khyndai ngut ki rangïalehkai na ka daw ka jingshah sei da ka red card ha u rephri.
Kane ka kynhun ka la duh noh ïa u Ieitlang Syiemlieh, uba la shah sei red card ha ka minit kaba 10 na ka daw ka jingïatakhuh bad u rangïa -lehkai ka Lakecity u Marvin Kham -muanthang. Ka la duh ruh sa ïa u rangïalehkai ‘dien u Banraplang Pyngrope ha ka minit kaba 76 na ka daw ka jingïatakhuh bad u Arif Shaikh.
Wat hapdeng ka jingïalehkai tang khyndai ngut ki rangïalehkai, ka Nongkseh ka la ïai bteng ban ïakhun tyngeh na ka bynta ban pynphai, hynrei u rangapkol ka Lakecity u Hitendra Singh u la lah ban kyrda ban pyllait na ka jingshah thep.
Ka Nongkseh ka la ïoh ïa ka kabu ksiar ha ka minit kaba 17 hadien ba u Kynsailang Khongsit u la ïoh ban shut tyngeh ïa ka bol, hynrei um shym la lah ban thep.
Hashwa ban kut ka jingïalehkai jong ka kylla step, ka Nongkseh ka la bteng ban ïakhun tyngeh ha kaba u Hardy Cliff Nongbri ula ïarap ban pynbuh bol na ka bynta u Owanijuh, hynrei um shym la lah ban thep na ka daw ka jingïashah tyngeh u Hitendra.
Ka Lakecity ka la jan thep hi sha la ka jong ka kol ha ka minit kaba 51 hadien ba u Hardy u la shut sha kol, hynrei u Saurabh Nikam, u la kum pyndei da ka khlieh ïa ka bol ha kaba ka la her sha kol, hynrei da ka jingstet u Hitendra uba la lah ban pyllait na ka jingshah thep.
Hapdeng ka jingdon tang khyndai ngut ki rangïalehkai, ka Nongkseh ka la bteng ban pyrshah ban ïoh pynphai ha kaba u Dawanchwa u la ïoh ban shut ha ka minit kaba 85, hynrei ka la her shabar na diengkol. Haduh kaba kut ka Nongkseh kam shym la lah ban pynphai bad ka la mad ïa ka jingshah rem.
Haba phai sha kawei pat ka jingïalehkai kaba la long kham hashwa, ka Godavari FC ka la pynliem noh ïa ka Chhaygaon FC da 3-1 kol.
Te kumta ka Godavari bad ka Lakecity ki la kamai mar 9 poiñ, katba Nongkseh ka dangsah 6 poiñ bad ka donkam ban ïakhun tyngeh ha ka jingïalehkai kaba khatduh pyrshah ïa ka Godavari kaba bat ïa ka kyrdan ba hakhlieh, ha ka sngi Thohdieng por 5 baje janmiet.
