Shillong, Risaw 28
Ka Sorkar Jylla ka la aiwai ïa ka jaka kaba don kumba 20 acre ha Mawkhanu kaba ha New Shillong sha ka NorthEast United Football Club.
Ïa kane la rai la shim ha ka jingïalang jong ka kynhun myntri ha ka sngi Ba-ar ha kaba katei ka jaka ka don kumba 19.99 acre, la aiwai na ka bynta 45 snem sha katei ka klob jong ka Indian Super League na ka bynta ban seng ïa ka shlem ai jinghikai phutbol.
U Myntri Rangbah ka Jylla u Conrad K Sangma, uba pynïaid ïa katei ka jingïalang, u la ong ba ka jingseng ïa ka shlem ai jinghikai ka long ban pynlut kumba T. 40 haduh 50 klur.
Katei ka jaka ka kynthup ïa lai tylli ki madan ïalehkai phutbol, ki jaka sah na ka bynta ki nongïalehkai bad kiwei kiwei ki jingtei kiba thmu ban kyntiew ïa ki sap ïalehkai jong ka thaiñ bad ban plie lad ïa ki khynnah ba kin ïoh ban paw haduh ki kyrdan ïalehkai kiba heh.
U Sangma u la ong ba kane ka sien jam kan pynurlong ïa ka jingthmu jong ka Mission Football ka Jylla.
“Katba ngi dangbteng ban pynkhlaiñ ïa ka jingïalehkai phutbol naduh tynrai bad ban kyrshan ïa ki klob trai ri, kane ka jingthmu kan ïarap ban pyndap ïa ka jingkhang hapdeng ka kyrdan ïalehkai naduh tynrai shaduh ki jingïalehkai ba kham heh,” u la bynrap.
