Shillong, Risaw 28
U Neeraj Yadav, uba la khur takma ksiar lai sien ha ka Asian Para Games, u la khlad noh hadien ba la ïathuh ba u la pynïap hi ïalade ha ka sngi Ba-ar ha ka ïingsah jong u ha Delhi.
Ïa kane la pynthikna da u coach para athletics jong ka ri u S Satyanarayana. Ïa ka post-mortem la pyndep ha ka sngi Balang ha GTB Hospital kaba ha Delhi, ha kaba la ïadon lang u nongïalehkai Paralympic u Sumit Antil lem bad uwei pat u nongïalehkai para-athlete u Vipin Kasana. U Satyanaran u la ong ba u dap da ka jingsngew kyndit hadien ba ka la mih ka khubor halor ka jingkhlad noh u Neeraj.
“Nga sngew kyndit ban ïohsnew ïa kane ka khubor. Ki nongïalehkai kim dei ban leh kum kine ki kam. Nga dang pyrshang ban ïakren bad ki bahaïing jong u. Hynrei nga la ïoh ïa ka khubor ba uwei u nongïalehkai um don shuh bad ngi. U Neeraj Yadav u dei u nongjop ha ka Asian Games bad u long ruh uba tbit kum u nongïalehkai. Kane ka long ka jingduh kaba khraw ïa ngi baroh,” la ong u Satyanarayana.
Watla u la ïoh ïa ka jingpang polio (Residual Paralysis) ha ka rta kaba 7 snem, u Neeraj u la long u nongïalehkai ba kynsai ha kaba u la shim bynta ha ka kyrdan F55 ha ka para javelin bad ka discus throw. Une u rangïalehkai ba 42 snem ka rta na Uttar Pradesh u la khur ïa ka takma ksiar ha ka jingïalehkai javelin throw ha ka Jakarta Asian Para Games 2018 bad ha Hangzhou Asian Para Games 2022. U la ïoh ruh ïa ka takma ksiar ha ka jingïalehkai discus throw ha Hangzhou.
Ka kyrdan F55 ka dei ka kyrdan jong ki para-athletics ha ki jingïalehkai kawang kum ka javelin, discus bad shot put.
Ki khubor ki ïathuh ba u Neeraj, u don hapdeng ka jingdiaw mynsiem hadien ba u la duh ban shim bynta ha ka Asian Para Games ha Aichi-Nagoya, kaba la kut dangshen mynta u bnai, na ka daw jong ka jingshah pynsangeh hadien ba la lap ba u la pyndonkam ïa ki dawai kiba la mana pyrshah. Ïa ki jingjia kiba la jia halor ka jingïap jong u, ym pat lah ban pynthikna. U la ju ïalehkai mynshwa ïa ka jingïalehkai wheelchair tennis hapdeng u snem 2005 bad 2012 shwa ban kylla hashwa ba un kynriah noh sha ka jingïalehkai para-athletics.
Ha u Risaw jong u snem 2023, u Neeraj Yadav u la shah tes ba la lap ba u la pyndonkam ïa ki kynja dawai steroid Stanozolol hadien ba la shim nongmuna (sample) da ka National Anti-Doping Agency (NADA) ha SAI Centre ha Bengaluru.
Te kumta u la pynngat ha ka jingpynkheiñ ïa ki kyndon jong ka Anti-Doping Rule Violation (ADRV) ha u Naiwieng jong u snem 2023 bad la buh ïa u hapoh ka jingshah sospon kaba shipor ha u snem 2024.
Lyngba katei ka jinglap ïa u Yadav, ka la pynlong ka jinghiar ka India ha ka jingkhur takma ha ka Hangzhou Asian Para Games, namar ba ar tylli ki takma ksiar ki la shah knieh noh.
Kumta ka jingkheiñ ïa ki takma jong ka India ki la hiar na ka 111 sha ka 108 tylli, kynthup ïa ka jingduna ïa ki takma ksiar na ka 29 sha ka 27, kaba la pynlong ïa ka India ban hiar na ka kyrdan kaba san sha ka kyrdan kaba hynriew.
