Moscow, Jylliew:
Ka Russia ha kane ka kynti ka la pharep ia ka United States ba ka dei ban shim jingkit-khlieh halor ka jingleit ther bom ka Ukraine sha Crimea kaba long ka thaiñ ba pyniasoh bad ka Russia. Ha kane jingjia 4 ngut ki riew paidbah ki la khlad, kynthup ia 2 ngut ki khynnah rit bad kumba 100 tam kiba mynsaw.
Namar la ong ba u ‘namding ba la ther da ki shipai ka Ukraine u la leit ban poi sha ka nongbah Sevastopol bad u la bthei ha katei ka jaka ba ki paidbah ki dang shong jah thait kaba dei ka jaka shyiap rud duriaw.
Kumta, na ka liang ka Russia ka la ong ba ka US bad ka Ukraine ki dei ban shim ka jingkit-khlieh halor ka jingther bom sha katei ka jaka ba shong ki ‘riew paidbah ha kaba 3 ngut ki khynnah rit bad 2 ngut napdeng jong kitei ki ‘riew paidbah ki la khlad. Ha kane ka jingjia la iathuh ruh ba kumba 120 ngut ki la shah ktah bad mynsaw na ka jingbthei jong kitei ki bom ba la siat da ki shipai ka Ukraine.
U Lat ka Sevastopol, lyngba ka durkhih kaba u la pyllait ha ka Telegram, u la iathuh ba 5 ngut ki ‘riew paidbah ki la duh ei ia ka jingim ha katei ka jingjia bad palat 120 ngut ki la mynsaw ha katei ka por.
Hadien kata, utei u heh u la pynthymmai ia ka jingkheiñ jong ka jingdon kiba khlad bad mynsaw ha katei ka jingjia bad u la pyntikna ba ka jingdon kiba khlad ka long 4 ngut. Katba ka jingdon kiba mynsaw pat ka la kisew sha ka 151 ngut baroh, ha kaba 82 ngut ki dei kiba la mynsaw bun bad kiba dang thiah ban shah sumar ha ki jaka ai jingsumar.
Haba iadei bad kane, u President ka Russia- u Vladimir Putin u la phah ia ka jingsngewlem na ka liang jong u sha ki iing- ki sem jong kitei ki paidbah kiba ngat ha katei ka jingjia bad u kular ruh ba ka Russia kan pynphai kylliang halor katei ka jingleh dusmon bad jingbym suitñiew jong ka Ukraine ia ki mynsiem briew kiba don hapoh Russia.
Namar la ong ba katei ka nongbah kaba iasoh bad ka Black Sea bad kumjuh ruh ka Crimea, ki long ki thaiñ kiba la pyniasoh lang bad ka Russia naduh u snem 2014 hynrei ki dang hap hi pat hapoh u pud- u sam jong ka Ukraine.
Hynrei, la ong ba tad haduh ka Lah Sngi U Blei ruh ym shym la don ba pynphai ktien ne kren shaphang kane la ka long na ka liang jong ka United States ne ka Ukraine ruh kumjuh.
