Shillong, Jylliew 25
Ka Spain ka la ïai bteng ïa ka jingjop kaba lai na ka bynta ban bat ïa ka kyrdan ba hakhlieh ha ka Group-B ha ka lympung Euro 2024 hadien ba ka la lah ban pynliem noh ïa ka Albania ha ka sngi Ba-ar.
Hadien ba kane ka kynhun kaba la pynthikna lypa ban jam sha ka pre-quarter final, u coach ka Spain u Luis de la Fuente u la wanrah ka jingkylla ïa ki rangïalehkai hadien ba pynliem ïa ka Italy kum lahduh jong ki saw snem mynshwa.
U Ferran Torres, uba la ïohpdiang ïa ka nam man of the match, u la lah ban pynurlong ïa ka Spain ban khur ïa ka jingjop hadien ba u la ïoh ban thep ha ka minit kaba 13. Ka jingïalehkai bha u Torres lem bad ki para nongïalehkai ka la pynlong ïa ka kynhun u De La Fuente ban kynjoh sha ka thong jong ka jingjop.
Kumba ka paw ka jinglah ban pynurlong ka Spain ban khur jingjop ha baroh lai sien ïakhun jong katei ka group ka long ka jingïaibteng naduh u snem 2008, ha kaba la lah ban khur ïa ka nam lahduh. Ka jingangnud ka Albania ban ïoh rung sha ka pre-quarter final kam shym la urlong ha ka sien kaba nyngkong eh ha kaba ka la wan ha ka kyrdan ba shatrai joing kane ka group ha kaba ka la kamai tang 1 point na ki lai sien ïakhun.
Kumba ka long mynta ka Spain kaba la ïoh ban bat ïa ka kyrdan ba hakhlieh jong ka Group-B, ka la kamai 9 point, katba ka Italy ka la wan ha ka kyrdan ba-ar da kaba kamai 4 point hadien ba ka la lah ban pynïakhaid mar 1-1 kol pyrshah ïa ka Croatia, kaba la wan ha ka kyrdan balai bad kamai 2 point.
Haba phai sha kawei ka jingïakhun hapdeng ka Croatia bad ka Italy ka la long kaba ïakhaid bha ha kaba ym shym la don ba lah ban thep kol ha ka kylla step. Hynrei u Luka Modric u la ïoh ban pynkhih jar nyngkong eh na ka bynta ka Croatia ha ka minit kaba 55, hynrei hashwa ban wai u Mattia Zaccagni u la lah ban pynïakhaid kylla na ka bynta ka Italy ha ka minit kaba 90+8.
