Nongpoh, Risaw 30
Lyngba ka jingïoh mynsiem na ka meiieid Kmoin Wahlang wat ha ka rta kaba 78 snem, hynrei kaba dang mih shakhmat ban leit ïakhun ha ki rynsan mareh marathon ha kylleng ki jylla ka ri bad wat sha ki ri nongwei ruh kumjuh bad ïoh ban khur ïa kiba bun ki takma, kala pynlong ïa u Bah Oral Syngkli, u wei na ki riew rangbah ka thain Ri-Bhoi ban pynlong ïa ka 1st Above 40 Years One Day Knock Out Football Tournament 2026.
Ha kane ka lympung ïalehkai phutbol kaba la pynlong ha madan jong ka Western Ri Bhoi Sports Association ha Patharkhmah, la wan ban ïadon ryngkat da u Phadar Kynsai Kurbah Parish Priest ka Umkadhor, u Pastor F. Syngkli na ka Jirang Presbytery, u Bah Oral Syngkli trai ka Syngkli Colony FC kaba pynïaid ïa kane ka lympung lem bad ki riew rangbah ka thain.
Kum shi bynta jong ka jingpynkhreh na ka bynta ka jingïaid beit ïaid ryntih kane ka lympung, ka Syngkli Colony FC kaba dei ka nongpynïaid jong kane ma lympung, ka la wanrah ruh ïa ka Physiotherapist ba pawkhmat ka thain Western Ri Bhoi, ka Isha Syngkli.
Haba ai jingkren ha kane ka sngi, u Bah Oral Syngkli ula pynpaw ba ka jingpynlong ïa kane ka lympung kadei ba u la ïohi ïa ka nuksa jong ka meiieid Kmoin Wahlang ba wat ha ka rta kaba 78 snem, hynrei ka dang lah ban leit ïashim bynta ha ki lympung mareh bad ioh ban khur ïa ki takma jingjop.
‘Lada ka meiieid Kmoin Wahlang ka lah, balei ma ngi ngim lah’ la ong u Bah Oral Syngkli da kaba bynrap ba ka met ka jong ngi ka long kum ka temple kumta ngi donkam ban sumar bad pynkhuid ïa ka kam pher lada ngi dei ha kano kano ka rta ruh, hynrei ban long kiba adkar bad kiba phikir ïa la ka koit ka khiah.
Ha kane ka sngi, la ïoh ruh ka jingkren na u Phadar Kynsai Kurbah bad u Pastor F. Syngkli kiba la ai khublei kyrpang ïa u Bah Oral Syngkli uba shim ïa kane ka sienjam ban pynlong ïa kane lympung ban ai pat sha ka imlang ka sahlang ïa kaba U Blei ula kyrkhu ïa u bad ka ïing ka sem.
Ki la kyntu ruh ïa ki paidbah kin bud ïa kane ka nuksa ha ka jingim ka jong ki ba kin don ïa ka mynsiem na ka bynta ka imlang ka sahlang ban sam lem ïa kaei kaba U Blei u kyrkhu bad theh sei ha ka jingim ka jong ki.
Haba phai pat sha ka jingïalehkai ha kane ka sngi, ki don kumba hynriew tylli ki kynhun kiba la wan ban ïashim bynta naduh na Umroi, Umsning, Nongpoh bad ruh na ki kynhun ka thain Western Ri Bhoi.
Ha ka phainal jong kane ka lympung, la ïakhun da ka kynhun jong ka OIG Jong-i pyrshah ïa ka RBWO. Ka jingïakhun ka long kaba ïakhaid bad kaba itynnad naba baroh ar ki kynhun kila sei ïa la ki sap ki phong bad ka jingïakhun kala kut noh ha ka jingïakhaid khlem don ba ïoh thep kol tad haduh kaba kut minit.
Hadien ka jingïakhaid, ki nongpynïaid ki la shim ïa ka rai ban pynïalehkai noh da ka tie-breaker bad dei ha kane ka por ba ka OIG Jong-i kala lah ban pynliem noh ïa ka RBWO da 5-3 kol.
Kum ka lahduh, ka OIG Jong-i kala ïoh ban rah ïa ka song pisa kaba T.50 hajar katba ka RBWO kaba wan ba ar, kala ïoh ban rah ïa ka song pisa kaba T.30 hajar.
