New Delhi, Jylliew:
Ka Myntri ba dei khmih ïa ka umbam-umdih ha Delhi ka Atishi hynnin ka sngi ka la pynkut noh ïa ka jingïakhih shah thngan jong ka namar ba ka la shah ktah ha kaba ïadei bad ka koit ka khiah bad shah pynkit sha ka jaka ai jingsuamr, la ong u MP jong ka seng u Sanjay Singh.
Ka Atishi ka la sdang ïa ka jingshah thngan ha ka 21 tarik, Jylliew ha ka por ba dang kyrduh um bha ha Delhi, ha kaba la dawa ïa ka sorkar Haryana ba kan nang pynbun ha ka jingphah ïa ka um sha Delhi.
Ka nongïalam jong ka seng AAP ka Atishi ka la shah pynkit sha Hospital hadien ba la hiar palat ka shini hynnin ka step, kaba long ka sngi kaba san jong ka jingshah thngan jong ka.
Ka la shah pynkit sha LNJP Hospital ha ka nongbah Delhi ha ka por 3:48 jong ka step Sngi Ba-ar, bad mynta ka la kham ïohbor, la ïathuh u Medical Director jong ka LNJP Hospital, u Suresh Kumar bad u la bynrap shuh shuh da kaba ong ba ka jinglong ka koit ka khiah jong ka Atishi ka la shah ktah bha ha ka por ba ka la shah pynkit sha ka jaka ai jingsumar.
“Ha ka por janmiet shwa kane ka sngi, ka kynhun jong ngi ka la leit jngoh bad leh ïa baroh ki jingdonkam, la shem ba ka shini jong ka Atishi ka la hiar bha. Ka la shah bthah ba la dei ban leit thiah hospital noh, hynrei ka la kyntait, bad haba la leh ïa ki Test la shem ba la hiar ka shini, bad tlot,” la bynrap u Kumar. Namar ka jingtlot palat la pynthiah ïa ka ha Emergency ICU ha ka step jong ka sngi Ba-ar.
