Shillong, Jylliew 26
Ka England bad ka Slovenia ki la ïasam mar shi point hadien ba ki la ïakhaid khlem don ba thep kol ha ka jingïakhun kaba khatduh na ka Group-C jong ka lympung Euro 2024 kaba la long ha ka sngi Balang.
Wat la ki la ïakhaid, hynrei ka England ka la ïoh ban bat ïa ka kyrdan ba hakhlieh jong ka Group-C ha kaba ka la kamai 5 point, katba ka Slovenia ka la nangjan ban ïoh rung sha ka pre-quarter final ha ka sien kaba nyngkong eh, hadien ba ka la wan ha ka kyrdan balai bad kamai 3 point.
Ka England, kaba la ïoh rung lypa sha ka pre-quarter, ka la pyrshang ban ïakhun tyungeh ha kaba ka la ïoh ïa lai tylli ki kabu ksiar. Haba kheiñ kyllum kane ka kynhun ka la ïoh haduh 71% ha ka bynta kaba shakhmat, hynrei kam shym la lah ban pynurlong na ka daw ka jingïashan tyngeh ki rangïalehkai ‘dien ka Slovenia.
Ha kawei pat ka liang ka Slovenia ka la ioh ban lehkmen lyngba ka jinglah ban ïakhaid. Kane ka dei lyngba ka jingshan tyngeh ha ka bynta kaba shadien kaba la pynlong ban iakmai ïa ka shi point na ka bynta ban ïaryngkat mar 3 point bad ka Denmark, kaba la lah ban pynïakhaid khlem don ba thep kol pyrshah ïa ka Serbia.
Wat la ki la kamai mar 3 point, hynrei ka jingïapher ha ka jingthep kol ka la pynlong ïa ka Denmark ba bat ia ka kyrdan ba-ar, katba ka Slovenia ka don jingkyrmen ban ïoh rung kum kawei na ki saw tylli ki kynhun kiba kynsai ki ban shah kynthup na ka bynta kawei pat ka wat jingïakhun.
Kane ka jingïakhaid kan ïarap ban pyllait ïa ka England ban ïakynduh na kiwei ki kynhun kiba khlaiñ bor kum ka France, Germany, Spain bad ka Portugal ha ka pre-quarter final. Hynrei ka jingkylli mynta ka long haduh ka England kaba la wan ba-ar ha ka Euro 2020 ka lah ban ne em ban noh ïa ka nam lahduh na ka Italy.
Te kumta ka Denmark kan ïakynduh pyrshah ïa ka Germany ha ka pre-quarter final ka ban long ha ka 30 tarik mynta u bnai ha Dortmund, katba ka England kan leit sha Gelsenkirchen na ka bynta ban ïakhun pyrshah kawei ka kynhun ka ban wan ha ka kyrdan balai.
