Seoul, Jylliew:
Ka North Korea ha ka Sngi Balang ka la pyrshang pynher ia u ‘namding ‘Ballistic Missile’ sha bynta duriaw lajong wat hadien ka jingmaham jong ki ri ba marjan namar ka jingma jong kitei ki ‘namding kiba lah ban ktah ia ki ri ba marjan lada ki leit poi bakla ne iaid shabar u pud- u sam jong ka.
Ki heh ka South Korea ki la iathuh ba ha katei ka sngi ki la iohi ia utei u ‘namding uba leit her bad suh sha ki duriaw jong ka North Korea.
Kumjuh ruh na ka liang ki bor pyniaid ka Japan, ki la iathuh ba ka North Korea ha katei ka sngi ka la pynher ‘namding biang hynrei utei u ‘namding um shym la poi sha Japan bad u la leit suh noh sha ka duriaw jong ka North Korea hi.
Kumta, la ong ba kane ka jingpynher ‘namding jong ka North Korea ka long ruh ha kum kane ka por ba kane ri ka dang iakynad bad ki ri marjan. Ha kajuh ka por ruh la ong ba ka North Korea ha kane ka por ka la sngew shngaiñ namar ka la ioh ia ka jingkyrshan jong ka Russia kumba u President ka Russia- u Vladimir Putin u la kular ba ka Russia kan ai jingkyrshan ia ka North Korea wat lada ka donkam ia ki tiar thma ne ki tiar iada haba don kiba pynthud ne thombor ia ka.
Namar la ong ba ka jingpynher ‘namding ba khatduh jong ka North Korea hadien ba la maham da ka US bad kiwei pat ki ri, ka long ha ka 30 tarik u Jymmang, ha kaba ka South Korea ka la kynnoh ia ka North Korea ba ka la pynher be-aiñ haduh 10 tylli ki ‘namding ha katei ka sngi.
