Shillong, Jylliew 26
U Roberto De Zerbi un pynkhreh ban shimti kum u coach bathymmai ka Marseille hadien ba kane ka klob na France ka la mynjur ïa ka jingïateh soskular.
U De Zerbi, u la mih noh na ka Brighton hadien ka jingshimti ka jong u kaba ar snem, ha kaba la pynlong ïa kane ka klob jong ka Premier League ban wan ha ka kyrdan ba hynriew, bad ka la jam ruh sha ka pre-quarter final ha ka UEFA Europa League.
Na ka liang ka Marseille ha ka kyrwoh ba la pyllait ha ka Lah Sngi U Blei ka la pynpaw ba kane ka jingïatrei lang baroh arliang mamla na ka bynta ban wanrah ïa utei u coach uba na Italy bad shen un sa wan poi ha ka Marseille.
U De Zerbi un mih bujli ha ka jaka u Jean-Louis Gasset, uba la pynkut noh ïa kane ka kam ha kaba kut jong ka aïom ïalehkai jong ka Ligue 1.
Naduh ba la wan shimti u trai na America u Frank McCourt ïa ka Marseille ha u 2016, kane ka kynhun kam shym la lah ban kiew shaphang ha kam ïalehkai haba la wanrah ïa kiba bun ki coach ban shimti ïa kane ka klob.
Kumba ka paw kane ka klob ka la kylliang coach haduh 30 sien naduh ba la sdang ïa kane ka klob bad kane ka long kaba heh duh napdeng ki klob kiba ha France. Kane ka kynhun kaba la bat ïa ka nam lahduh ha ka Champions League 1993 ka la duh rung sha katei ka lympung hadien bal ka la wan ha ka kyrdan ba phra ha ka lympung ïalehkai kaba ha France.
Ka Marseille ka la lah ban pynpaw ïa ka jingtbit ha ki lympung ïalehkai phutbol naduh u 1980 haduh 1990.
