Shillong, Jylliew 26
Ka kynhun ïalehkai ka ri India kan pynkhreh ïa ka jingïakhun semi final ha ka Men’s T20 World Cup pyrshah ïa ka England kaba dei ka lahduh jong ka aïom ba la dep ka ban long ha ka Sngi Palei ha Guyana ha ka por 8 baje janmiet.
Kane ka jingïakhun ka long ka jingïai bteng kumba long ha ka semi final jong u snem ba la dep, ha kaba ka England ka la jop da 10 wiket ha Adelaide.
Ha kane kajuh hi ka sngi ka South Africa kan ïakynduh kham hashwa ïa ka Afghanistan ha ka por 6 baje janmiet ha Trinidad bad kane ka long ka sien kaba nyngkong eh ïa ka Afghanistan ban rung sha ka semi final.
Kumba ka paw ka India kam pat ju lah ban khur ïa ka jingjop ha kane ka lympung naduh u 2007, bad mynta ka kynti ka la khmih lynti ban ïalehkai bha na ka bynta ban khur ïa ka nam lahduh kaba nyngkong eh ha ka World Cup.
Ka Guyana National Stadium kaba don haduh 20 hajar tylli ki jaka shong, ka dei kaba don shabar ka Georgetown, kaba hajan ka wah Demerara bad kaba jngai tang kumta katto katne kilometre narud ka duriaw.
Ha kane ka lumpung ka India ka la lah ban khur jingjop ha manla ki jingïakhun bad ka la shah khate ar point ha ka jingïakhun pyrshah ïa ka Canada na ka daw ka jingther u lapbah ha Lauderhill.
Hynrei kane ka kynhun ka la lah ban ïalehkai bha ha ka Super Eight jong ka Group 1 da kaba ka la lah ban pynliem noh ïa ka Bangladesh, Afghanistan bad ka Australia na ka bynta ban jam sha ka semi final.
Haba phai sha ka England ka la long da khongphong ha kaba kane ka kynhun ka la duh ïalehkai pyrshah ïa ka Scotland da ka daw ka jingjur slap bad hadien ka la shah rem ha ka Australia, hynrei ka la lah ban jam sha ka Super Eights.
Ha ka jingïakhun jong ka Super Eight, ka England ka la duh jingkyrmen lyngba ka jingshah rem ha ka South Africa, hynrei ka la jop ïa ka West Indies bad hadien sa ïa ka USA. Lyngba ka jingjop ka South Africa ïa ka West Indies ka la long ka jingplie lad ïa ka England ban jam sha ka semi final na ka Group 2.
Ki kyrteng ki rangïalehkai ka India ki long u Rohit Sharma (c), Hardik Pandya, Yashasvi Jaiswal, Virat Kohli, Suryakumar Yadav, Rishabh Pant, Sanju Samson, Shivam Dube, Ravindra Jadeja, Axar Patel, Kuldeep Yadav, Yuzvendra Chahal, Arshdeep Singh, Jasprit Bumrah bad u Mohd. Siraj.
Ki rangïalehkai ka England ki kynthup ïa u Jos Buttler (c), Moeen Ali, Jofra Archer, Jonathan Bairstow, Harry Brook, Sam Curran, Ben Duckett, Tom Hartley, Will Jacks, Chris Jordan, Liam Livingstone, Adil Rashid, Phil Salt, Reece Topley bad u Mark Wood.
