Kyiv, Naitung:
Katkum ki khubor, la ong ba ka Russia ha ka Sngi Nyngkong, ka la ther bom sha ka ka hospital ba kongsan jong ki khynnah kaba don hapoh ka nongbah Kyiv jong ka Ukraine da u ‘namding ha ka por mynsngi. Ym tang katta, hynrei ka Russia ka la ther bom ruh sha kiwei pat ki nongbah ha kylleng ka ri Ukraine, ha kaba ym duna ïa ka 41 ngut ki riew paidbah kiba la duh ei ia ka jingim ha kitei ki jingleit thombor ba thymmai jong ka Russia ha kane ka taiew.
Katkum ki dur kiba la saphriang katei ka sngi, la iohi ia ki kmie ki kpa kiba dang rah ia ki khun rit jongki katba ki dang iaid sakma ha ka surok shabar jong katei ka hospital, bad kitei ki paidbah ki dap da ka jingsyier bad jingsheptieng halor katei ka kam thombor kaba kim shym poi pyrkhat ba kan leit hap ha ki ha katei ka sngi.
U President ka Ukraine- u Volodymyr Zelensky, uba la leit hiar shuwa ha Poland shwa ba un leit pat sha United States na ka bynta ka jingialang jong ka NATO, u la ai jingkheiñ ia ka jingdon kiba khlad na katei ka jingjia ha katei ka sngi, ha kaba u la ong ba ym duna ia ka 37ngut kynthup ruh ia lai ngut ki khynnah kiba la shu duh ei noh ia la ka jingim ha katei ka sngi bad palat 170 ngut ruh ki la ngat bad mynsaw ha kitei ki jingjia thombor kiba la wanrah da ka Russia ha ka Sngi Nyngkong. Katba, ka jingkheiñ jong kiba khlad bad kiba mynsaw ka la nang kiew shuh shuh katba ki bor pynïaid ka Ukraine ki dang ioh peit thuh bad wad jingtip bha na baroh ki liang.
