London, Naitung:
Ki pulit jong ka United Kingdom ha ka Sngi Balang ki la pyntip ba ki la ioh ban kem noh ia uwei u briew uba ha ki rta ba 26 snem hadien ba ka tnga bad arngut ki khun kynthei jong u nongthoh khubor ki la shah pyniap da ka ryntieh ‘Crossbow’ ha ka jingshah thombor kaba la suba ba utei u briew u don jingiadei bad ki nongsuhbuit ha katei ka kam thombor.
U Kyle Clifford, 26 snem ka rta, uba na Enfield kaba don shatei jong ka London, u dei uba la shah thwet halor ka jingsuba don kti halor ka jingiap jong kitei ki lai ngut ki kynthei, ha ka shnong Bushey hapoh ka nongbah London bad kaba la jia ha ka miet jong ka Sngi Ba-ar.
Kitei kiba la shah pyniap ki kynthup ia ka Carol Hunt, kaba 61 snem ka rta, kaba long ka kurim jong u nongthoh khubor ka BBC bad u nongkren jong ki jingialehkai ‘Race’ jong ka Sky Sports- u John Hunt bad ryngkat ruh ki arngut ki khun kynthei jong ki, ka Louise, 25 snem bad ka Hannah, 28 snem ka rta kiba la duh noh ia ka jingim jongki ha katei ka jingshah thombor ba khlem poi pyrkhat.
Katkum ka khubor ba la iohlum ha kane ka Sngi Balang, la ong ba ki pulit ki pulit ki la iathuh ba u Clifford, uba la lap da ki ophisar ha Enfield, u dei uba don jingithuh ia kitei kiba shah pyniap bad kumta ki pulit ki la bat noh shwa ia u shipor naka bynta ki jingtohkit kiba kham bniah.
U Clifford u dang don mynta hapdeng ka jingsumar hadien ba la lap ia u ba u la mynsaw bad ki pulit ki la ialeh ban pynioh ia ka jingsumar kaba kyrkieh khnang ba kin ioh ban tohkit bniah ia u haba iadei bad katei ka jingjia.
Ki pulit ki la iathuh ba ha katei ka sngi ba la lah, ki la ioh ia ka phone kaba la pyntip sha ki heh pulit katei ka nongbah halor ka jinglap ia kitei ki 3 ngut ki kynthei ha kawei ka iing, ha kaba ki la leit poi mar-mar bad shem ruh ia ka metiap jong kitei ki kynthei ha katei ka iing.
La ong ba kam shym long kaba donkam ia ka License ban buh ia ka ‘Crossbow’ hapoh ka ri UK hynrei ka long kaba be-aiñ pat ban rah ne pyndonkam ia ka ha ki jaka paidbah khlem ka daw kaba biang.
Ka Myntri kam pohïing jong ka Britain- ka Yvette Cooper ka la pynpaw ka jingsngewkhia kaba khraw halor katei ka jingjia kaba shyrkhei bad ka la kular ruh ba kan aiti ia katei ka kam ha ki tnat ba dei khmih ba kin tohkit bad wad bniah haba iadei bad katei ka jingjia bad ba kin pynshitom ruh ia kat kiba don kti Katkum ki kyndon pynkheiñ aiñ ba la buh.
