Tehran, Risaw:
Katkum ki khubor, la iathuh ba ka Pakistan, ka la iakren bad ka Iran, na ka bynta ban ioh ïa ka lynti kaba shngain, na ka bynta ka liquefied natural gas carrier, ka Al Mayeda, shwa ba katei ka jhad, kan shah thombor hajan ka duriaw Hormuz, ha ka sngi Palei, katkum ka jingiathuh jong ki briew kiba tip thikna ïa katei ka kam.
Ka jhad kaba don ka lama jong ka Marshall Islands ka dang iaid sha ka lynti um kaba la thep da ka LNG na Qatar haba ka la shah siat, la ong ki paidbah da kaba kyrpad ban nym pynpaw kyrteng namar ba kim don bor ban kren sha ki lad pathai khubor. Tang katto katne kynta mynshwa, la sngewthuh ba ki bor synshar jong ka Iran, ki la ai ïa ka jingshai kaba saw, ki la bynrap.
Hadien kata, katei ka jhad, ka la kylla bad leit sha ka Persian Gulf, katkum ka jingtip jong ki liengsuin.
“Ka Qatar ka buh ïa ka hok ban shim ïa baroh ki lad ki lynti, katkum ki aiñ jong ka pyrthei bad ka UN Charter, ban ïada ïa ki mar ki mata jong ka bad ban ïada ïa ki jhad jong ka bad ki nongtrei jong ki,” ong ka tnat kam bar ri jong ka Qatar ha ka jingpynbna ha ka sngi U Blei, da kaba bynrap ba ki bor synshar ki dang tohkit ïa kane ka jingjia bad ïa kito kiba donkti.
U Sarbananda Sonowal, myntri ka tnat jhad jong ka India, ula thoh ha ka X, ba katei ka jhad, ka la shah thombor ha ka jingbthei jong ki projectile. U la ong ba baroh 25 ngut ki nongtrei jong ka liengsuin, kynthup ïa 6 ngut ki nong India, ki don ha ka jingshngain hynrei um shym la ai jingtip shuh. Ka Qatar Gas Transport Company Ltd., kaba la tip kum ka Nakilat, ka iathuh ha ka Sngi U Blei, ba katei ka liengsuin, ka dang treikam bad dang bishar bniah ïa ka.
Ym shym la lah ban tip satia balei ba katei ka tanker ka la shah siat ne hato kan dang pyrshang ban poi sha ka jaka ba ka leit. Ka Pakistan, kumba ka paw, ka ïoh jingmyntoi na ka jingïadei jong ka bad ka Iran bad ka bynta jong ka kum ka nongpynïasuk, ka la ïakren bad ki bor synshar jong ka Iran halor ka jingshngaiñ jong ki katto katne kiwei pat ki jingshalan LNG jong ka Qatar ha une u bnai ba la dep, ha kaba kine baroh ki la ïaid lyngba da kaba jop sha ka duriaw bah jong ka Oman.
Ka jingjia ka pynpaw ïa ka jingma kaba dang ïai bteng na ka bynta ki jhad kiba ïaid kylleng ka Hormuz bad ka buh ïa ka jingeh kaba thymmai ïa ka Pakistan, kaba la ïakhun da ki bnai bad ka jingduna bor ding namar ka jingkylla ha ka thaiñ Mihngi. Khlem ka jingshalan ïa ka LNG, ka Pakistan ka lah ban shah pynbor ban phai sha ka iew die marbam, ha kaba ka dor ka long palat lai shah ïa ka dor shwa ka thma.
Ka tnat umphniang jong ka Pakistan, ka QatarEnergy bad ka tnat kam bar ri jong ka Iran kim shym la jubab mardor halor ki jingkyrpad ban ai jingtip halor kane.
