Tehran, Risaw:
Ka Iran, ha ka Sngi U Blei, ka la maham ba kano kano ka thma kaba thymmai bad ka America, ka lah ban neh kham slem ban ïa ka jingialeh kaba mynshwa bad ba U President jong ka America, U Donald Trump, un nym dei satia, uba rai ïa ka por jong ka.
“Ka thma kaba lah ban jia hadien habud, ka lah ban neh kham slem ban ïa ka jingiakynad kaba la dep jia baroh shi katta bad u President jong ka America, un nym don bor eiei ruh bann batai ïa ka por lane ki kyndon jong ka jingpynkut ïa ka”, la ong u nongaiktien jong ki shipai, u Mohammad Akraminia, katkum ka khubor telebishon jong ka sorkar Iran.
Utei u rangbah u la kdew ïa ka bynta kaba jur tam jong ka jingïakhun ha ka thma kaba la sdang naduh ka 28 tarik u Rymphang da ki jinghiar thma jong ka US bad ka Israel ïa ka Iran, ha kaba u nongïalam ba ha khlieh duh jong ka Islamic Republic u Ayatollah Ali Khamenei u la ïap.
Ka Iran ka la jubab da kaba siat ïa ki namding bad ki drone ha kylleng ka thaiñ, katba ki kynhun lehnoh kiba ka kyrshan ruh ki la rung sha ka jingïakhun ha Lebanon bad Yemen.
U Myntri ka tnat kam poh ïing jong ka Iran, u Mehrdad Akhlaghi, ha ka sngi U Blei, u la maham ïa ka “jingkynthoh kaba ïahap, kaba rai, bad kaba ktah” ïa kano kano ka jingshah thombor ha ka ri, ong ka TV jong ka sorkar.
Kumjuh ruh ha ka Sngi U Blei, u Hossein Mohebbi, uba dei u nongaiktien jong ka Islamic Revolutionary Guard Corps, ka tnat pyrkhat pyrdain jong ki shipai jong ka Iran, u la pynpaw biang ïa ki jingkren ba la kren da u nongïalam ba hakhlieh duh ba thymmai jong katei ka ri, u Ayatollah Mojtaba Khamenei, ha ka khubor ba la thoh ha ka sngi kaba shwa.
“Ha ka jingialeh bad ka America, ym don ki jingpynbeit ïa ka jaka; la batai ïa ka jaka lehkai kaba heh bha na ka bynta ban pynjulor ïa u nongshun,” la ong u Mohebbi, katkum ka TV jong ka sorkar jylla.
U President jong ka America, U Donald Trump, u la ong ha ka sngi saitjaiñ ba ka America ka la pynhap bun na ki shipai jong ka Iran hynrei ka dang hap ban “sumar” ïa kawei ne ar tylli ki thong.
“Ngi la pynduh noh ïa u nuclear jong ki. Ngi dang hap ban sumar, ngan ong kawei ne ar tylli ki jaka, hynrei ngi lah ban leh ïa kata hapoh 10 minit,” la ong u Trump.
