Washington, Risaw:
U President ka America, U Donald Trump, ha kane ka sien u la pynpaw ba un burom ïa ka resol ba ka rai jong ki paidbah haba iadei bad ka ilekshon shiteng samoi ka ban wan, lada ïa ki jingthep vote, la pynlong da kaba hok bad kaba shai, katba u la maham pat ruh ba u lah ban pyndonkam ïa ka bor jong u, lada donkam, namar ba ka ilekshon jong ka 3 tarik u Naiwieng, ka la jan, namar ka jingsngewkhia halor ka jingleh thok jong ki nongthep vote bad ka jingïakhun ban synshar ïa ka Congress.
Haba ai jingkren sha ki nongthoh khubor ha ka Sngi Ba-ar, u Trump u la ong, “Ngin sa wad ïa ka lad. Nga don ïa ka bor ‘veto’ kaba khlaiñ. Nga kyrmen ba kan ym long kumta, hynrei lada ka long kumta, kata ka la jia mynshuwa… Ngan sa leh , lada ki dei ki elekshon kiba hok.”
Kane ka jingkren jong u ka long ha ka por ba u President u la pynjur ïa ka jingpyrkhat jong u halor ka jinglong hok jong ka elekshon ha shwa ka jingthep vote shiteng samoi, ka ban rai ïa ka jingsynshar halor baroh ar tylli ki kamra jong ka US Congress bad ka lah ban ktah jur ïa ka agenda thaw aiñ jong u ha ka por ba dang sah jong u.
Kham mynshwa, u Trump u la pynbna ban ai khusnam USD 1 million ïa kino kino kiba ai ïa ki sakhi kiba lah ban leh halor ka jingleh thok jong ki nongthep vote kiba ïadei bad ki elekshon ba la dep lane ki elekshon pdeng samoi 2026 ban wan, katkum ka jingkem bad pynrem ïa kito kiba donkti.
Ha ka jingthoh ha ka Truth Social, u Trump u la ong, “Uno uno uba pyntip ïa ka jingleh thok jong ki nongthep vote ha ki elekshon ba la dep, lane ha ka elekshon shiteng samoi 2026 ban wan, un shah siew $1,000,000 ynda la kem bad pynrem ïa kito kiba la thaw ïa ka jingleh thok! Khublei shibun ïa ka jingshimkhia jong phi ïa kane ka kam.”
Ha ka elekshon kaba 3 u Naiwieng, yn ïakhun ïa baroh 435 tylli ki seat ha ka ïing dorbar thawaiñ, ryngkat bad kumba shi bynta na ka lai bynta jong ki seat ha ka Senate. La khmih lynti ba ki jingmih kin pynwan dur ïa ka jingïahap jong ka bor saiñ hima sima ha Washington bad kan pynthikna haduh katno ka jingsynshar ka lah ban pynïaid shakhmat ïa ki jingthmu ba kongsan jong ka ha ka polisi.
Katkum ka jingwad bniah jong ka CBS News kaba la pynmih ha ka sngi U Blei, la khmih lynti ba ki Democrats kin jop 229 tylli ki seat ha ka iing dorbar, kaba lah ban ioh ïa ka jingbun paid, watla ki Republican ki dang bat ïa ka lynti kaba khim ban bat ïa ka jingsynshar.
