Milwaukee, Naitung:
Katkum ki kaiphod ba la ioh lum da ka FBI, la ong ba uwei u runar ba la siat ia u President barim ka US- u Donald Trump ha ka jingialang ïalap ilekshon ha Pennsylvania ha ka Sngi Saitjain, la paw ba u la leh marwei ia katei ka kam khlem da iadon kti lang badno- badno.
Ïa utei u nongsiat la ithuh kum u Thomas Matthew Crooks, uba dang don tang 20 snem ka rta. La ong ba utei u khynnah samla, u dei uba jar-jar bad uba ju shah pynthud ne shah leh i-beiñ wat ha ki jaka pule da ki paralok-parajor jong u.
Haba la tohkit bniah ia u, la shem ba utei u briew u la leh hi marwei ia katei ka kam khlem da don ki nongpynshit ne kiba iasuh-buit lang bad u ban leh ia katei ka kam thombor hynrei ka tnat FBI ka dang pynïaid shakhmat ia ka jingtohkit bniah ban lap pat ia ka daw bad jingthmu jong utei u samla da kaba shim ia ka jingim jong utei u nongialam barim ka US ha kane ka por.
Ka FBI, ha ryngkat ka tnat iakhun ia ki kam pyntriem jong ki lehnoh hapoh US, ki dang tohkit bniah ban lap ia ka jingthmu jong utei u samla ha katei ka jingjia bad kumjuh ruh ban tip shai la u don jingiadei ne em pat bad kino-kino ki kynhun lehnoh ne ki kam thombor jong ki lehnoh ha kiwei pat ki jingjia. Hynrei la ong ba dei ka FBI kaba lam khmat bad shim jingkitkhlieh halor ka jingtohkit haba iadei bad katei ka jingjia ha kane ka sien.
Ha katei ka sngi, la ong ba u Trump u la mynsaw na ka jingksam u kuli uba iaid lyngba na ki bynta jong ka shkor kadiang jong u. Hynrei, katei ka jingmynsaw kam long kaba heh bad kumta u la koit noh bad u la bteng biang ia ki kam- ki jam jong u baroh kynthup ruh ia ka jingleit jong u sha Milwaukee ban ïashim bynta ha ka jingïalang jong ka Republican National Convention, ka ban pynieng kyrteng ïa u kum u kyrtong president jong ka party pyrshah ïa u Joe Biden.
Wat la katta, ka FBI ka la ong ba u nongsiat ha katei ka jingjia, u lah ban dei utei uba la khlad lang ha katei hi ka jingjia hynrei ka jingtohkit kan dang iaid shakhmat ban lap shuh-shuh ia kiei kiei baroh kiba don jingiadei bad katei ka jingjia. Namarkata, la ong ba ka FBI kam pat lah ban ai jingtip shai ha kane ka por bad ka dang donkam ban tih jylliew bad ban wad bniah bha khnang ban ioh ia ki jingtip kiba bniah baroh.
Haba iadei bad kane, la ong ba katkum ka jingshem jong ki heh ka FBI, la sngewthuh ba utei u nongsiat ha katei ka jingjia um shym dei uba don jingduna ha ka bor pyrkhat ne u bym biang ka jingmut- jingpyrkhat. Hynrei, ka lah ban don kaei- kaei sha lyndet kaba pynlong ia u ban thmu siat iap ia utei u nongialam barim ka US haduh ba um kwah shuh ia utei u nongialam ba un ioh ban synshar biang ia ka US ha kine ki por ki ban wan.
Shuh shuh ruh la ong ba ka suloi kaba utei u nongsiat u pyndonkam ha katei ka jingjia, ka dei ka suloi ‘AR’ – 5.56mm, ka suloi kaba ju pyndonkam bha ha kum kine ki jait jingjia.
Kumta ki heh ka FBI ki dang bud dien ruh halor kane ka jingjia lyngba jong ki ‘Account’ Social Media jong utei u nongsiat ha kane ka por.
