Nuseirat, Naitung:
Ka tnad iada ri jong ka Hamas hapoh Gaza ha ka step Sngi Nyngkong, ka la iathuh ba ha ka Sngi U Blei, 15 ngut ki la duh ei ia ka jingim ha ka jingleit thombor jong ki liengsuiñ ka Israel sha kawei ka skul kaba la pyndonkam kum ka jaka rieh bad jaka sah ia ki paidbah nong Gaza ki bym don iing- don sem shuh naduh ba khie ka thma Israel bad Gaza ha katei ka nongbah.
La ong ba ka Israel ha ka Sngi U Blei, ka la leit hiar thma sha katei ka bynta Abu Araban kaba la pynïaid bad khmih hi da ka UN ha ka ktem Nuseirat jong ka Gaza pdeng naka bynta ban peit-thuh ia ka jinglong- jingman jong ki paidbah bad ban pynbit pynbiang ruh ia ki jingdonkam ba kongsan jong ki paidbah nongshong shnong ha kum kane ka por ba ki hap ban mad ia ki jingeh ba bun jait kiba wan mih na ka thma jong ka Israel bad Hamas.
Katei ka skul kaba don hapoh Abu Araban, ka long ka jaka ba la pynsah ia ki hajar ngut ki briew kiba la shah pynkynriah jaka noh na kito ki thaiñ kiba ka Israel ka leit ban hiar thma bad kiba la phet noh na kito ki jaka ki bym shngaiñ ban lait na ki jingma jong ka thma.
La ong ruh ba ki skul kiba don ha Nuseirat ki la long ka thong jong ki ar tylli ki jingleit thombor ka Israel pyrshah ïa ki lehnoh Palestine jong ka Hamas kiba la sdang ïa ka thma da kaba ther ia ki hajar tylli ki ‘namding bad kumjuh ruh da kaba leit hiar thma sha ki bynta khappud ka Israel ha ka 7 tarik u Lber, ha kaba ki la rahbor ruh da ki spah ngut ki nong Israel ha katei ka por ka jingleit hiar thma jongki ia ka Israel ha utei u snem ba la lah.
Kumjuh ruh na ka liang ka tnat shipai jong ka Israel, ka la pyntip ba ha katei ka sngi ka la ioh ban thombor bad pynliem ruh ia katto- katne ngut ki lehnoh Hamas kiba don ha katei ka iingskul Abu Araban jong ka Unrwa ha Nuseirat.
