Shillong, Naitung 15
U Lionel Messi u la lah ban khur ïa ka trophy kaba lai sien kynthih ha ka jingïakhun jong ka Copa America 2024 hadien ba ka Argentina ka la lah ban pynliem da 1-0 ïa ka Colombia ha ka jingïakhun final kaba la long ha ka step jong ka Lah Sngi U Blei.
Kane ka jingïalehkai ka la jan kut noh da ka jingsngewsih ïa u Messi naba la hap ban bujli noh ha ka kylla miet namar ka jingmynsaw tyrpeng. Katba u Messi u dang ïam na jaka shong, hynrei ki paralok jong u ki la lah ban pynthikna ban khur ïa ka trophy nam lahduh, ha kaba u Lautaro Martinez u la ïoh ban thep kol ha ka minit kaba 112 jong ka extra time.
Kumba ka paw kane ka khusnam kaba 45 jong u Messi ha ka jingim jong u, ha kaba u la tam ïa ka rekod jongu Dani Alves na Brazil.
Na ka bynta ka Argentina, u Messi mynta u la jop saw tylli ki nam lahduh ha ka pyrthei tang hapoh lai snem. U la ïadon bynta ban khur jingjop ha ka FIFA World Cup ha u snem 2022 bad u la khur ruh ar tylli ki Copa America, bad sa kawei ka Finalissima naduh u snem 2021 haduh 2024. U Messi u la ïoh ban khur haduh 39 tylli ki nam lahduh ha ka jingïalehkai ba pawnam jong u ha ka klob, kaba bun na kine ki la wan ryngkat bad ka Barcelona.
U la jop ïa baroh 12 tylli ki nam lahduh (10 tylli bad ka Barcelona, artylli bad ka PSG), saw tylli ki khusnam UEFA Champions Leagues (baroh kine ki dei bad ka Barcelona), bad 17 tylli ki khusnam hapoh ka ri (baroh 15 tylli bad ka Barcelona, kawei bad ka PSG bad kawei ha ka MLS na ka Inter Miami).
U la khur jingjop ruh ïa ka UEFA Super Cup bad ïa ka FIFA Club World Cup. Ha ka jingïalehkai ka pyrthei, u Messi u la ïoh ban khur ruh ïa ka jingjop bad ka Argentina ha ka lympung ïalehkai U-17 World Cup 2005 bad ha ka Olympic Games 2008.
Kum u rangïalehkai, u Messi u la khur haduh phra sien ïa ka khusnam Ballon d’Ors bad hynriew tylli ki Golden Boots.
Haduh mynta ha ka jingïalehkai jong u, u Messi u la thep haduh 838 tylli ki kol bad 374 tylli kiba u la ïarap pynbuh bol ha ki 1068 tylli ki jingïalehkai.
Kum u rangïalehkai ba dang-khynnah ha Rosario, ka jingïaid lynti u Messi kam long kaba suk, hynrei ka jingim jong u ka la kylla hadien ba ka Barcelona ka la wan khot. Kaba sah ka la long ka khana katkum ka jingïalehkai jong u ha katei ka klob, hynrei u Messi u dangïai bteng ban long u nongïalehkai ba kynsai ka pyrthei.
Hynrei ha kine ki 4 snem ba la lah, u Messi u la pynshisha ïa la ka jinglong ba pawnam ha ka pyrthei ruh kumjuh, ha kaba u la jop 3 tylli ki khusnam kiba heh bad ka Argentina bad ka jingkhur ïa ka nam lahduh ha ka Copa America 2024 ka dei kaba khatduh ïa u Messi ba un phong ïa ka jong ka ri jong u.
