Beijing, Naitung:
Ki bor pynïaid ka China ha ka Sngi Palei ki la pyntip ba jingkem ding kaba la klang ha kawei ka jaka iadie- iathied ha ka thaiñ shatei lam mihngi jong ka China, ka la shim ia ka jingim jong 16 ngut ki mynsiem briew ha ka step phyrngab jong ka kane ka sngi.
La ong ba ki kynhun iarap ki la ioh ban sei lut ia ka met jong kitei kiba khlad baroh haduh ka por 3 baje mynstep jong katei ka Sngi Palei.
Katkum ka dur khih ba la pynsaphriang da ki lad pathai khubor, la iohi ia ka tdem kaba iong rben bha kaba mih na katei ka iingmala kaba don haduh 14 mala hapoh Zigong jong ka nongbah Sichuan.
La ong ba katei ka iingmala ka la sdang ban kem ding ha ka por janmiet ha katei ka jaka die jingdie kaba don ha kjat jong katei ka iing mala.
La ong ba ki kynhun iarap ki la ioh ban pyllait im ia kumba 30 ngut ki briew kiba don hapoh jong katei ka complex, ha kaba ki kynhun pynlip ding pat ki la leit poi sha katei ka jaka ha ka por kumba 8 baje jong katei hi ka step Sngi Palei.
Tad haduh ka por 3 baje jong katei ka step phyrngap Sngi Palei, ki bor pynïaid ki la pynthymmai ia ka jingkheiñ jong kiba khlad na katei ka jingjia hadien ba la ioh ban sei lut baroh, ha kaba la ong ba ki don haduh 16 ngut kiba khlad baroh na ki khyndiat ngut kiba la pynbna hashwa.
