Raipur, Naitung:
Ha kum kane ka por ba ka la don ka jingshah pynïap jong ki shipai ha ka thaiñ Jammu, ki kynhun tohkit ki la shem ba ka la don ka jingsiat kaba kham pher bad kaba kham khlaiñ ha ka por ba siat ki lehnoh, ha kaba kane ka pyni ba ki lehnoh ki la ïoh ïa ka jinghikai pyntbit na ki shipai ne ki kynhun hiar thma.
Ki la don kumba lai ngut ki pulit bad u nongïalam kiba la shah pynïap ha ka jingïasiat kaba la jia ha ka sngi Ba-ar ha Doda.
Ki la don baroh kumba 11 ngut ki shipai kiba la ïap na ki kam thombor jong ki lehnoh ha Jammu haduh mynta ha une u snem.
Kumba la ïathuh ka tyllong khubor kaba la wan na ki kynhun tohkit, la ong ba ka jingïap jong ki shipai ha kine ki por ba mynta ha Jammu ka la long ha ka por ba la don ki jingleit khynra lehnoh bad ka jingïasiat kaba markyliang bad kine ki la long ki lanot ha ka jingshah siat wat lada ki la phong da ki jingda kuli, ha ka khlieh bad ka shadem.
Kumba la ïathuh ka tyllong khubor, la ong ba ki shipai ki la ïap namar ba ki lehnoh ki la ïoh na ki jaka ba biang ban siat pyrshah ïa ki.
Naba ki lehnoh ki la lap ïa ki jaka kiba thymmai na ka bynta ban rungtuh sha ki bynta jong ka thaiñ Jammu ha ki bynta jong u International Border bad Line of Control, mynta ki la ïoh ban rung sa ha ki bynta jong ki khlaw kiba rben bad ban wad ïa ki jaka kiba biang na ka bynta ban pynlong jaka rieh bad kiba biang ban ïakhun pyrshah ïa ki shipai, la ïathuh ka tyllong khubor.
“Kiba kum kine ki lehnoh kiba la pynlong jaka rieh ha ki jaka khlaw ha Jammu ki dei ki lehnoh bar ri ha kaba ki la ïoh ïa ki buit ban ïakhun thma kum ki shipai bad ruh ki la ju siat briew da ki Sniper Gun.
Kumba la suba la ong ba kin don beit katto katne ki shipai ba la shongthait jong ka Pakistan kiba don bynta ha kine ki kam thombor bad ai jinghikai pyntbit,” la ong uwei na ki heh ka kynhun tohkit.
