Washington, Naitung:
U kyrtong President jong ka seng Republican, u Donald Trump, ha ka Sngi U Blei u la ong ba u la sngewthuh lypa ba ka Vice President- ka Kamala Harris ka long ka kyrtong ka ban kham suk ban shah rem ha kane ka ilekshon ka ban long ha u Naiwieng 2024 haba ianujor bad u kyrtong barim u President jong ka Democratic- u Joe Biden, uba la mih noh na ka thup jong ki kyrtong ban iakhun na bynta katei ka ilekshon President ka ban sa long shen. Haba iakren bad ki nongthoh khubor ka CNN, u Trump ha katei ka sngi u la kren sting bad ong ba ka Harris kan kham suk ia u ban jop lada ianujor bad u Joe Biden.
La ong ruh ba u Trump ha ryngkat bad ki dkhot bad ki nongkyrshan ka seng jong u, ki la kynthoh ruh ia u President ka US- u Biden bad kumjuh ia ka Harris ha ki rynsan Social Media da kaba ong ba kitei ar ngut nongialam kim long kiba bit na ka bynta katei ka shuki President kaba tang ma u hi u long uba bit tam ban ioh bat ia katei ka shuki.
U Biden u la pynkut ïa ka jingïalap ilekshon jong u ha ka Sngi U Blei hadien ba ki para dkhot bad nongkyrshan jong u ki la duh jingshaniah ha u halor ka jinglah jong u ban pynliem ïa u Trump. Kumta u Biden u la mih noh na katei ka thup jong ki kyrtong ki ban iakhun ha katei ka ilekshon President bad u la ai jing-kyrshan noh ia ka Harris ban mih bujli ha ka jaka jong u kum ka kyrtong.
Namar la ong ba u Biden u la nang sngew artatien bad sngew duh jingkyrmen hadien ba la iohi ia ka jingtlot ka seng jong u ha ka jingiatynjuh bor ha kane ka sien bad kane hi ka la pynlong ia u ban mih noh na ka jingiakhun naka bynta katei ka ilekshon President ha une u snem.
Kiwei pat ki riew paw khmat jong ka Republican, ba kynthup ïa u Speaker jong ka Ïingdorbar- u Mike Johnson, u la ong ba u Biden um long uba bit ban shakri kum u President bad un nym lah shuh hi ruh ban pynkut ïa ka samoi treikam jong u lada un jop biang sa shisien bad kumta u Johnson u la kyntu da kaba shai ia u Biden ba un mih noh na katei ka thup ki kyrtong ki ban iakhun ha katei ka ilekshon President.
Katba, u Trump pat ha ka jingthoh kaba u la kren sha ki paidbah lyngba ka Social Media, u la ong ba ki bor pynïaid ba thymmai kin sa iakynduh jingeh bha haba iadei bad ka rukom synshar- khaddar bad ka rukom pynïaid ia ki kam ki jam hapoh ka ri namar ki jingeh kiba la dep buh lypa da ka sorkar jong u Biden. Hynrei u la ong pat ba ynda u la jop bad ioh biang ban don ha ka bor, ma u bad ka sorkar jong u, kin ialeh ban weng noh kloi ia kitei ki jingeh kiba ka sorkar jong u Biden ka la wanrah ha kine ki snem ba la leit haduh kane ka kynti.
Namar la iohi ruh ba u Trump bad u Biden ki la kham ïakhaid ha ka jingdon ki vote lane ki nongkyrshan ha kine ki khyndiat por ba la leit, hynrei hadien ka jingïakren halor katto-katne ki jingthep vote, la pyni ba u Trump u la tam khyndiat ban ïa u President ka US ha ka jingïakhun na ka bynta ka ilekshon ka ban long ha u Naiwieng.
Haba iadei bad kane, ka channel YouTube jong ka Republican National Committee ka la pynmih ïa ka video kaba ar minit ha ka janmiet jong ka Sngi U Blei ha kaba ka la kynthoh bad pynrem ïa ka Harris halor ki kyndon aiñ wan buhai shnong jong ki phetwir lane ki mynder ri, da kaba kynnoh ba ka la leh klet bad katei ka kam.
Dang ha kine ki taiew ba la leit, ka jingpynkhih win jong u Trump bad ki katto katne ki nongkyrshan jong u, ki la pynrem lypa ïa ka Harris ban pyrshang pynjah burom ïa ka hapdeng ka jingïakren ba ka lah ban bujli ïa u Biden haba iadei bad ka tiket President jong ka seng ha une u snem 2024.
