Guwahati, Naitung:
Ka jingpynbun halor ka jingpynshitom ïa ki 32 ngut ki briew kiba la shah rai pynrem ha ka mukotduma jong ka jingpynbam tyngka na ka bynta ban ïoh kam sha ki heh jong ka Agriculture Development Officers (ADO) ha Assam la ai hynnin ka sngi, ka 29 tarik, Naitung.
Katkum ka tyllong khubor ba la ïoh lum, la ong u Chairman barim jong ka ka APSC u Rakesh Pal u la shah rai ban set patok 14 snem bad daiñ kuna da `.2 lak katba u Basanta Kumar Doley bad u Samedur Rahman ki la shah rai ban shong patok 10 snem bad ka kuna kaba mar `.50 hajar.
Katba kiwei pat kiba shah kynnoh (29 ngut ki nongthep kam ki la shah rai ban shah set patok 4 snem ryngkat bad ka kuna kaba mar T .10,000.
Ha ka 22 tarik, Naitung, ki la don 32 ngut ki briew kiba la shah rai pynrem kiba kynthup ïa u Chairman barim jong ka Assam Public Service Commission (APSC) u Rakesh Paul, ha kaba ïadei bad ka mukotduma kaba la mudui ha thanat Bhangagarh ha u snem 2017 hapoh ka jingtreikam jong ka Prevention of Corruption Act.
Ka nongbishar ka Thakuria ka la pyllait ïa ki 11 ngut kiwei pat kiba la shah kynnoh namar ka jingbym don ki sabut kiba biang ki ban long pyrshah ïa ki, katba ka dkhot ka APSC ka Binita Rynjha ka la kylla nongmynjur halor kane. Kiba la shah kynnoh donkti, ha kane ka mukotduma ki don haduh 44 ngut kiba kynthup ïa 4 ngut ki dkhot bad uwei u nongtrei jong ka Commission, 3 ngut ki riewpaidbah bad 36 ngut ki nongwadkam.
Ka ïingbishar ka la peit bniah ba ïa ka jingpynjur jong ka jingpynshitom yn sa pynbna hadien ba la dep bishar ïa baroh kiba la shah rai pynrem. Uwei na ki nongwad kam uba khlem lah ban ïoh ïa ka kam ba u la khmih lynti, u la buh da ka jingujor ejahar, ha kaba u la kynnoh kynnoh ba la pynkiew ïa ki mark jong uwei pat u nongwad kam ha ka jaka jong ki da ka jingtreikam ka pisa. Da kaba pynshong nongrim halor kane ka jingujor, la ujor mukotduma bad la sdang ïa ka jingtohkit.
Une u nongmudui u la ai ïa ka jingkyrpad RTI na ka bynta ki jingtip kiba bniah kiba ïadei bad ki jingkylla ha ka jingbuh jingthoh ïa ki marks bad u la kam ba u la buh da ka jingujor halor ka nongrim jong ka kaiphot jong ka.
U Paul ryngkat kiwei pat ki dkhot ka kynhun bad ki heh jong ka APSC, ki la shahkem ha kaba ïadei bad kawei pat ka mukotduma ba ïadei bad ka kam pisa na ka bynta ki kam kaba ïadei bad ka Combined Competitive Examinations (CCE) na ka bynta ban thungkam ïa ki heh kam Civil bad ki heh pulit.
Ki Pulit ka Assam ki la kem haduh 70 ngut ki briew, ba kynthup ïa u Paul bad 57 ngut ki heh sorkar naduh u snem 2016 ha kaba ïadei bad ka jingdonkti jong ki ha kum kine ki kam be-aiñ.
