Guwahati, ïaïong:
Kumba la buh jingkheiñ, la ong ba ki la don palat 1,000 ngut ki briew ki la duh ei ïa la ka jong ka jingim ha palat 4,200 tylli ki jingjia aksiden ha surok ha kylleng ka jylla Assam haba sdang ki lai bnai jong u snem 2026, katkum ka jingkheiñ ba la pynmih ha ka 28 tarik, Ïaïong,
Ka tnad pynïaid kali jong ka jylla, ka la ong ba ki don 4,219 tylli ki jingjia aksiden ha surok bad 1,008 ngut kiba ïap hapdeng u bnai Kyllalyngkot bad Lber mynta u snem, haba ïanujor bad 4,232 ngut ki jingjia aksiden bad 1,035 ngut kiba ïap ha kajuh ka por ha u snem 2025.
Ki khyndai tylli ki distrik, kiba kynthup ïa ka Guwahati City, Kamrup, Nagaon, Lakhimpur, Sonitpur, Golaghat, Barpeta, Dhubri bad Hojai, ki don haduh 50% na ka jingïap baroh, ong ka kyrwoh khubor.
Ha kajuh ka por, katto katne ki distrik kiba bun briew kum ka Sonitpur, Nagaon, Dhemaji, Tinsukia, Dibrugarh bad Biswanath ki la paw ïa ka jinghiar na ka snem sha ka snem ha ka jingïap jong ki briew ha kum kine ki jingjia, kaba pyni ïa ka jingktah jong ki jingïarap ba la thmu bad ka jingpynjari aiñ kaba kham pyrkhing.
U Chief Secretary u Ravi Kotha u la bishar bniah ïa ka jinglong jingman jong ka jingshngaiñ ha surok ha ka jingïalang ha ka kyrdan jong ka jylla ha ka lah sngi U Blei, ha kaba bishar bniah ïa ka jingtreikam ha baroh 35 tylli ki distrik. .
U la kdew ba ka jingïap ka la hiar tang da 2.6% watla ka jingdon jong ki jingjia aksiden ka dang sah haduh kumba 11 ngut ki briew ki dang ïai bteng ban ïap man ka sngi ha ki surok jong ka jylla, kaba kdew ïa ka jingjur jong ki jingjia aksiden.
Ka jingshitom jong ka jylla ka long 0.24, kaba kham duna ban ïa ka jingkheiñ kyllum jong ka ri kaba long kumba 0.36, hynrei ka dang kham heh ban ïa ki jylla kiba kham shngaiñ haba ïanujor bad ki jylla kum ka Kerala bad Tamil Nadu, la ong ki heh sorkar.
Ha kane ka jingïalang, la bishar bniah ïa ki jingtip katkum ki distrik, da kaba pynleit jingmut ha ki jaka kiba pynpaw ïa ka jingkiew jong ki jingjia aksiden bad jingïap.
Ki bor pynïaid ki la pynlong ruh ïa ka jingpeit bniah ïa ka daw tynrai ban ithuh ïa ki jaka ba don jingma bad ki daw kiba lah ban ïarap.
U Chief Secretary u la hukum ïa ki District Commissioner bad ki Superintendent of Police ba kin pynlong ïa ka jingbishar bniah hadien man la ka jingjia aksiden hapoh ki District Road Safety Committee bad ban pynthikna ïa ki lad pynbeit kum ka jingpynbeit ïa ki jaka ba kham jia khah khah ki jingjia aksiden, pynbha ïa ki jingpyni dak, jingpynsngewthuh bad pynkhlaiñ ïa ka jingpyntreikam.
Ki heh sorkar ki la ong ba la pynmih ïa ki sienjam ba la buh por ban pynduna ïa ki jingïap, da kaba pynksan ba man la ka jingim kaba duh ha ki surok ka long kaba lah ban ïada.
