Agartala, Nailar:
Ki don haduh 108 ngut ki briew, kynthup ïa ki 77 ngut ki bar jylla, 23 ngut ki nong India, bad 8 ngut ki nongkhaïi, kiba la shahkem ha u bnai Naitung, namar ka jingwan rung tuh, ka jingkhaii tuh ha ki bynta khappud bad ka jingpynsuk ïa ka jingwan buhai shnong be-aiñ, la ong ki heh jong ka tnat shipai Border Security Force (BSF). Napdeng ki 77 ngut ki bar jylla, 71 ngut ki dei ki nong Bangladesh, bad kiba sah ki dei ki Rohingya, la ong ki heh shipai.
Ki BSF ki la ong ba lait na ka jingrung kyrthep beaiñ, ki la don kumba 56 tylli ki jingjia ïasiat da ki tiar bym lah ban pynïap briew ki la jia ha khappud ha u bnai Naitung jong une u snem, ha kaba ki la don kumba 70 tylli ki kuli ki la siat ban khanglad ïa ka jingrung kyrthep bad ïa ki nongleh kam beaiñ kiba ïaid lyngba khappud, ha kaba 6 ngut ki la mynsaw .
Ha kane kajuh ka por, ki mar ba la pyrkhing ban shalan kiba shongdor palat T.4 klur tyngka, kiba kynthup ïa ki 12,692 tylli ki kuli Yaba, 360 kilo u Ganja, 84.6 kilo u shini, 5,669 tylli ki bilor ka dawai um ba la shna da ka Codeine, bad 180 tylli ki masi, la kurup da ki shipai BSF.
Nalor kane, ki BSF ki la pynpra haduh 76 hajar tylli ki jaka rep Ganja ha ka jingtreilang jong ki bad ka tnad Forest ha u bnai ba la dep. Ki heh sorkar ki la ong ba khnang ban ïada na ki kam runar bad ki jingwan rung tuh nabar khappud, ki BSF ki la pynkhlaiñ ïa ka jingtreikam jong ki shipai ha ki bynta khappud, khamtam ha ki jaka ba don ki jingkhaïi tuh bad ki jaka ba lah ban wan rung tuh, bad ki la pynrung ïa ki Drone bad ki kor ring bad peit dur.
U Inspector-General of Police, BSF, ka Tripura, u Patel Piyush Purushottam Das, u la bthah ïa baroh ki heh shipai ba dei ban khmih bniah sha kylleng ki jaka ba ki la dei ban ïatreilang bad ki pulit ka Tripura, ki pulit ka jylla Tipura, ki shipai ka tnar Rifles ka Tripura, ki pulit ka tnat Railway, Railway Protection Force, Customs, Reserve Inspectors, Forest Department, bad kiwei pat ki kynhun kiba don bynta ban ïakhun pyrshah halor ki jingwan rungtuh jong ki bar ri bad ki jingkhaïi martuh ki la don bynta ha ki jingkhynra bad ki jingpyntreikam bapher bapher.
Hapdeng kum kane ka por ba ki kam thombor kiba dang ïai bteng ha Bangladesh, ki shipai BSF ki dang buddien ïa ki jingjia bad pynneh ïa ka jingïatreilang bad ki shipai pahara khappud jong ka Bangladesh (BGB), ong ki heh sorkar.
Ki la don kumba saw tylli ki jingïalang ba la buh bad ki heh shipai bad 150 tylli ki jingïalang jong ki nongïalam jong ka kompeni/BOP bad ki BGB ba la pynlong ha u bnai ba la dep nalor ka jingïalang jong ki nongïalam jong ka thaiñ IG BSF.
Ki jaka kiba rit paid ki shah khmih bniah ha ki BSF bad ki BGB ryngkat da kaba pynlong ïa ki jingpahara ba kyrpang, bad palat 100 tylli kum kine ki jingpahara la pynlong ha u bnai Naitung, 2024. Kane ka la pynskhem ïa ka jingshaniah hapdeng kine ki ar tylli ki kynhun shipai pahara khappud bad ka la nang pynkhlaiñ ïa ka jingïatreilang, pule ïa ka kyrwoh na ki BSF.
