Shillong, Nailar 06
U Ïarapborsing Kharbani u la khur ïa ka jingjop kaba lai ha ka rynsan ïakura jong ka Indian Pro Boxing Series 2024, katba u Shanborlang Marbaniang u la mad ïa ka jingshah rem bad u Banshanbha Nongsiej u la mad ïa ka jingïakhaid.
Ha katei ka rynsan ïakura ba la pynlong da ka Om Ayurveda Boxing Promotion hapoh ka jingkhmih da ka Indian Boxing Council ha ka 4 tarik mynta u bnai ha Mumbai, u Ïarapborsing uba na Sawmer Pynthor, u la lah ban pynliem noh ïa u Sahil Chouhan uba na Haryana lyngba ka jingïamynjur lang da baroh ki nongbishar ha ka kyrdan ïakhun jong ka 57.153 kg featherweight kaba don haduh hynriew tylli ki wat jingiakhun.
U Shanbor uba long u nongïakura ba paw na Umlyngka, u la mad ïa ka jingshah rem noh ha u Sagar Chouhan uba na Haryana ha ka kyrdan ïakhun jong ka 52kg Super Fly kaba don haduh phra tylli ki wat jingïakhun.
Haba phai sha u Banshanbha na Sadew uba la ïashim bynta ha ka sien kaba nyngkong eh ha ka Pro-Boxing, u la lah ban pynïakhaid pyrshah ïa u Sutu Rajpal uba na Haryana ha ka kyrdan ïakhun jong ka 55.25kg Super bantamweight kaba don haduh saw tylli ki wat jingïakhun.
Kumba ka paw kane ka dei ka sien kaba khyndai na ka bynta u Shanbor uba na ka shnong Umlyngka, ha kaba u la jop san sien, ïakhaid ar sien bad shah rem ar sien. Katba u Ïarapborsing, u la ïalehkai san sien ha kaba u la jop lai sien, ïakhaid bad shah rem mar shisien.
Na ka liang ka Meghalaya Profes-sional Boxing Council (MPBC) ka la ai khublei halor ka jingjop u Ïarapborsing bad kumjuh ka jinglah ban pynïakhiad u Banshanbha wat la ka dang dei ka sien kaba nyngkong eh ïa u ban ïashim bynta ha kane ka rynsan ïakura. Kane ka synjuk ka la ai khblei ruh ïa u Shanborlang ba watla u la mad ïa ka jingshah rem, hynrei u donkam ban dang trei shitom shuh shuh khnang ba un lah ban nangjam shaphrang ha ka jingïaid ka jong u ha kane ka kam ïakura.
