New Delhi, Nailar:
Ki doktor ha kylleng ka ri ki la kyntait ban leit sha ka kam, lait noh kito kiba dei ban ai jingsumar kyrkieh ïa ki nongpang, naba ki la pynlong ïa ka jingïakhih ban pyrshah halor ka jingshah leh beijot bad ka jingshah pynïap jong kawei ka doktor kaba la 31 snem ka rta ha RG Kar Medical College and Hospital kaba don ha Kolkata.
Kum shi bynta ban ai jingkyrshan halor ka jingïakhih, ka Federation of Resident Doctors’ Association (FORDA) ka la pynbna ba ka la pynlong ïa ka jingïakhih ha kaba ki la sangeh ban treikam ha ki hospital. Ha ka shithi ba la phah sha u Myntri ka sorkar kmie uba dei khmih ïa ka tnat ka koit ka khiah u JP Nadda, ka FORDA ka la batai shai halor ka jingjia kaba la jia ha Kolkata. Ka la dawa ïa ka jinghiar shuki jong baroh ki heh ba dei khmih lada kim lah ban ai ka jingïada bad ka jingshngaiñ na ka bynta ki doktor kynthei na kum kine ki jingshah thombor.
Nalor kane, kiwei pat kiba la pynlong ïa ka jingïakhih ki kynthup ïa ki doktor jong ka King George’s Medical University ha Lucknow kaba don ha Uttar Pradesh. Ha Mumbai, ki doktor ki la pynlong ïa ka jingïakhih ha kiba bun ki Hospital kiba kynthup ha JJ Hospital, Sion Hospital, Nair Hospital bad King Edward Memorial Hospital.
Ka jingai jingsumar ha AIIMS Delhi ruh ka la hiar da 80 per cent bad ka jingpynrung ïa ki nongpang ka la long tang 35 per cent hadien ba ki doktor ki la don bynta ha ka jingïakhih. Ka Myntri Rangbah jong ka West Bengal ka Mamata Banerjee ka la ai por ïa ki pulit jong ka jylla ba kin pyndep ïa ka jingtohkit halor ka jingjia haduh ka sngi U Blei, ha kaba hadien kane ka sorkar jylla kan sa rai ban phah tohkit ha ka kynhun CBI.
