New Delhi, Nailar:
Ka Federation of Resident Doctors’ Association (FORDA) ha ka Sngi Ba-ar ka la weng noh ïa ka jingïakhih ban pyrshah halor ka jingshah leh beijot bad ka jingshah pynïap jong kawei ka doktor ha Kolkata hadien ba ki la ïakynduh ïa u Myntri ka sorkar kmie uba dei khmih ïa ka tnat ka koit ka khiah u JP Nadda.
Kane ka kynhun seng jong ki doktor ka la shim ïa kane ka rai hadien ka jingïakynduh ïa u JP Nadda bad ha kane ka jingïakren ïa ki jingdawa jong ki la mynjur ban pyntreikam bad ban pynurlong kynthup ha kaba ïadei bad ka jingpyntikna ban pyntreikam ïa ka Central Healthcare Protection Act ka aiñ ka ban lah ban tehlakam bad ban khanglad ïa ka jingshah thombor jong ki doktor ne ki nongsumar.
Ha ka jingthoh ba la phah, ka FORDA ka la ong, “kumba la buh jingkyrpad”, kan sa long shi bynta jong ka kynhun ha ka Central Healthcare Protection Act, ka ban trei ïa ka kam ha kaba ïa kane yn sa sdang hapoh ki 15 sngi.
Ym slem hadien ka jingphah jingthoh jong ka FORDA, ka tnat ka koit ka khiah ka la pynbna khubor ha ka rynsan X ba u Nadda u la pdiang ïa ka rai jong ka kynhun seng ki doktor ha kaba la shimkhia na ka bynta ban pynïoh ki lad jingïada ba kyrpang ha kaba ïadei bad ki doktor ne kiwei pat ki nongsumar ha kaba ïa kane yn rah ha ka miej ïakren.
