Mawkyrwat, Nailar 16
Ka jingjia shah siat jong 5 ngut ki briew ha ka janmiet 14 tarik u Nailar, 2024 hajan ka shnong Nongdiloiñ, South West Khasi Hills District ka la pynpar ñiangkhriat bad pynshongsyier ïa ki paidbah katei ka dong ka thaiñ.
Ha kaba ïadei bad katei ka jingjia, na ka liang u Bah Phaibor Paliar, Acting Lyngdoh Kur Paliar ha ka 16 tarik u Nailar 2024 u la wan ban pynshai paidbah halor katei ka jingjia. Haba ïakren bad ki lad pathai khubor, u Bah Phaibor Paliar u la ïathuh ba ha katei ka sngi ha ka por kumba 2 baje eiei ka la don shuwa ka jingïakajia ha Ïew Umdohlun ha kaba ka la don ka jingbym ïa sngewthuh jingmut hapdeng ki paidbah bad ki nonglum bai musur namar ba ki piadbah kim ithuh ïa kitei ki briew kiba lum bai musur.
U la ïathuh ruh ba kum u nongsynshar jong ka Kur, u khlem tuklar eiei ïa katei ka kam bad u la shu ujor ha ki bor jong ka aiñ.
U la ïathuh ruh ynda ki la wanphai na Mawkyrwat ban leit noh sha shnong ha ka por kumba 7:20 janmiet, ynda ki la poi mar pyrshah u Lum Kulai Lum Sngun hajan ka shnong Demnar u la ïohi ïa ki kali bad ka bos kiba la ïeng baroh arliang ka surok. Haba u ïohi ruh ïa ki briew kiba bat ïa ki tiar bad ithuh ba dei ki briew kiba ïaleh pyrshah namar ka jingtieng u la phet krad sha la ka shnong bad pyntip ruh sha ki pulit shaphang katei ka jingjia.
U la ïathuh ruh ba hadien, kumba 20 minit eiei ki paidbhur kumba 100 ngut eiei kiba la bitar bha ki la leit sha ka jaka sah jong ki sha Nongdiloiñ bad ki la ker sawdong ïa ka ïing jong ki bad sdang ban kawang maw bad pynpait ruh ïa ki ïit bad ki la pyrta ruh ba kin mih shabar bad byrngem byrsit ba kin pynïap bad dih snam ïa baroh shi ïing.
U Bah Phaibor u la ïathuh ba ki don 26 ngut hapoh ïing kynthup ïa i khyllung dang shi bnai, bad ki khylllung kiba dang hapoh ka 10 snem, haba ïohi ïa kitei ki paidbhur kiba la bom bad tied ïa ka ïing, ki la tieng bad ki la ïam bad dei ha kata ka por ba u Bah Khreslan Lyngkhoi uba dei u kpa jong u Bah Phaibor Paliar uba thiah pang ha ïing bad dang shu wan na jaka sumar na Civil Hospital, Nongstoiñ ha ka jingbym banse ban ïada ïa ka ïing ka sem u la shim da ka suloi bad siat ïa kita ki paidbhur.
Hadien ka jingsiat u Bah Phaibor u la ïathuh ba kitei ki paidbhur ki la phet sha jngai hynrei hadien ki la bteng biang ban kawang maw ïa katei ka ïing bad hamar katei ka por la wan poi noh sa ki pulit bad kitei ki paidbhur ki la phet krad noh na katei ka jaka.
Ha kaba ïadei bad katei ka jingjia, na ka liang u Bah Phaibor Paliar u la pynrem jur ïa ka jingleh ‘riewkhlaw kitei ki briew. U la kyntu ruh ïa ki paidbah ba lada don ka jingïa bishni ïakynad kim dei ban leh shongshit hynrei ban ïakren bad ïa pynbeit ym ban leh kum katei ka kam ban thombor. U la kyntu jur ruh ïa ki bor jong ka aiñ ba kin shimkhia khnang ba kum kitei ki jingjia kin ym jia shuh kiba wanrah jingsniew ïa ka imlang-sahlang bad ka jingshongsyier ïa ki mynsiew briew.
Ha kaba ïadei bad katei ka jingjia, na ka liang u Bah Phaibor Palair bad ka ïing ka sem ha katei kajuh ka miet jong ka 14 tarik u Nailar 2024 ki la leit ban ujor da ka ejahar ha thanat Mawkyrwat pyrshah ïa kitei ki briew.
