Tehran, Naitung:
Ka America ka la phah leit hiar thma biang ïa ki shipai suiñ jongka sha Iran ha ka miet ba la dep bad ka la sdang thymmai biang ïa ka jingkhang ïa ki Kad liengsuiñ jongka, katba ka Tehran ka la thmu ïa ki paralok jong ka America ha Middle East namar ka la kular ban khang ïa ka duriaw Hormuz “haduh ba ka US kan pynkut noh ïa ka jingthombor jong ka.” Ha Iran, la iohsngew ïa ki jingbthei bom ha ki katto katne ki jaka, kiba kynthup ïa ka Qeshm Island, Bandar Abbas, Sirik, Chabahar, Konarak, Rask City, Khondab, bad ha ka nongbah Khorramabad, kaba don shaphang sepngi, ong ka khubor jong ka Al Jazeera.
La iohsngew ruh ïa ki jingbthei bom ha Ahvaz, ha kaba ka Mehr News Agency jong ka Iran, ka la iathuh ba ka Shahid Baghaei Hospital, ka la shah ktah na ka jingbthei bom jong ki America, ha kaba ka la pynjulor ïa ka tnat sumar ïa ki khynnah kiba pang cancer. Kumta, la hap ban pynkynriah noh ïa katei ka Hospital, kaba ai jingsumar ïa ki nongpang Cancer, kynthup ïa ki khynnah rit.
Ki jinghiar thma jong ki America ki la ther ruh ïa kawei ka jaka sah jong ki shipai Iran, ha kaba ym duna ïa ka hynriew ngut ki shipai ki la ïap bad mynsaw da ki spah ngut ki briew ha kylleng ka ri, ong ki heh sorkar Iran. Ha ka jingkheiñ kyllum, ka Tehran ka la ong ba ym duna ïa ka 35 ngut ki briew ki la ïap, bad palat 300 ngut ki briew ki la mynsaw ha ki jinghiar thma jong ki America haduh mynta.
La pyntreikam ruh ïa ki kor ïada suiñbneng ha ka nongbah jong ka Iran, Tehran, ban “pyrshah ïa ki jingbyrngem kiba shun,” ong ki lad pathai khubor jong ka sorkar jylla. Ki khubor kiba kham mynshwa, ki la kdew ruh ïa ki jingbthei bom ha kylleng ki jaka ba shathie kiba kynthup ïa ka Qeshm bad ka Bandar Imam Khomeini, katba ki lad pathai khubor jong ka sorkar jylla, ki la ong hadien ba ki jinghiar thma ba thymmai jong ka US, ki la lynshop ïa ka Bushehr, kaba dei ka jaka ba don tang kawei ka karkhana nuclear jong ki riew paidbah jong ka Iran.
Ka US Central Command (CENTCOM) ka la ong ba ka thmu ïa ki bor shipai jong ka Iran kiba pyndonkam ban byrngem ïa ki jhad kiba ïaid laitluid ha katei ka lynti um kaba kongsan. Ki shipai US ki la ong ruh ba kawei na ki liengsuiñ jong ka ka la siat bad pynthut ïa kawei ka jhad kit umphniang kaba thylli kaba dang pyrshang ban pynpra ïa ka jingkhang jong ki shipai duriaw ïa ki kad liengsuiñ jong ka Iran.
