Washington, Naitung:
U President ka United States, ha ka Sngi Ba-ar, u la maham ba un phah hiar thma biang ïa ki shipai US lada ka Iran kam lah ban mynjur ïa ki jingtyrwa jong ka US bad ha kane ka sien u Trump u la byrngem ba un ther bom ïa ki shlem treikam ba kongsan jogn ka Iran bad wat ïa ki jingkieng kiba pynsuk ïa ka leit- ka wan bad ka khaïi- pateng jong ka Iran.
“Ha ka taiew ban wan kan sa sniew shisha na ka bynta jong ki namar ba ha ka taiew ban wan kan wan ki jaka pynmih bording. Ha ka taiew ban wan kan wan ki jingkieng,” la ong u Trump ha ka jingiakren bad ka tnat pynbna khubor jong ka US.
“Ngin sa pynpra lut ïa ki jaka pynmih bor ding jong ki. Ngin sa pynpra lut ïa ki jingkieng jong ki lymda ki poi ha ka miej bad ïa kren.”
Kane ka jingkren jong u Trump ka long ha ka por ba ki shipai jong ka US ki la pynlong ïa ki jinghiar thma pyrshah ïa ka Iran ha ka sngi kaba saw lynter bad pynjari biang ïa ka jingkhang dam jong ki shipai duriaw ïa ki kad liengsuiñ jong kane ka ri.
Ka jingsangeh thma kaba tlot ha ka 17 tarik u Jylliew hapdeng ki arliang mamla ka la hiar thma, da kaba pynleit jingmut ha kaba synshar ïa ka duriaw Hormuz kaba kongsan bha.
La kylli haduh katno ki jingshah thombor jong ka US kin dang ïai bteng, u Trump u la jubab: “Kin dang ïai bteng haduh ba ngan da ong ba ka la biang.”
