Shillong, Nailar 18
Ka Mount Zions Secondary School ka la ïoh rah ïa ka nam lahduh ha ka lympung ïalehkai 4th Independence Cup Football Tournament 2024 ïa kaba la pynlong da ka HANM Mawryngkneng Circle.
Haba phai sha ka jingïalehkai Final kaba la long ha madan shnong Sohryngkham, ka skul Mount Zions ka la pynliem noh ïa ka Green Hills Higher Secondary School lyngba ka jingïashut tie-breaker hadien ba ka jingïalehkai ka la kut noh ha ka jingïakhaid.
Ïa ka khusnam nongïalehkai ba kynsai tam la ïoh da u Samuel Lambha Mawthoh na ka Sunshine Secondary School bad ka khusnam ‘rangapkol ba kynsai la ïoh da u Kelvin Lyngkhoi Khongwir na ka Mount Zions Secondary School.
Ha kane ka sngi, ki don hynriew tylli ki skul jong ka thaiñ Sohryngkham kiba la wan ban ïashim bynta kiba kynthup ïa ka Sohryngkham Presbyterian Secondary School, ka Mount Zions Secondary School, ka Persara Secondary School, ka Sunshine Secondary School, ka Sohryngkham Secondary School bad ka Green Hills Higher Secondary School.
Ka Mount Zions Secondary School kaba la jop ïa ka nam lahduh ka la ïoh khur da ka song pisa kaba T. 15 hajar ryngkat ka ‘trophy’ katba ka Green Hills Higher Secondary School kaba wan ba-ar ka la ïoh khur ïa ka khusnam kaba T. 10 hajar bad ka ‘trophy’.
La pynhap pyrda ïa kane ka lympung ïalehkai da ka jingsakhi lang u Bah E Kharmalki, u ophisar IAS ba la shongthait uba la long kum u kongsan ryngkat u President jong ka HANM Sengkmie u Bah Lamphrang Kharbani uba la long kum u symbud kongsan, ki nongïalam ka seng ba kynthup ïa u Bah Bawan Nongsiej, u Bah Wyraiwan Sohtun, u Bah Venus Rangslang, ki nonghikai lem bad kiwei kiwei kiba la shah khot sngewbha.
