Shillong, Nailar 19
U Kylian Mbappe um shym la lah ban pynurlong ban khur jingjop ha ka jingïalehkai kaba nyngkong jong u na ka bynta ka Real Madrid ha kaba kane ka lahduh jong ka lympung La Liga ka la mad ïa ka jingïakhaid mar 1-1 kol pyrshah ia ka Real Mallorca ha ka sngi U Blei.
Une u rangïalehkai ba pawnam jong ka France u la shah khang lad noh ha u nongapkol jong ka Mallorca u Dominik Greif bad hadien ba u Rodrygo Goes u la ïoh ban pynkhih jar na ka bynta ka Madrid, hynrei ka liang pyrshah ka la lah ban pynïakhaid kylla lyngba u Vedat Muriqi.
Ka kynhun jong ka Madrid kaba dap da ki khlur ïalehkai, ka la ïakhun tyngeh ban pynkhyllem ïa ka Mallorca ha Son Moix Stadium. U rangïalehkai ka Real u Ferland Mendy u la shah beh noh na madan hashwa ban wai namar ka jingïatakhuh pyrshah ïa u Muriqi.
“Ngi la ïaid shakhmat, ngi la ïoh ïa ki lad ban thep ïa ka kol kaba ar, bad nangta ha ka kylla miet ngi la duna ha ka rukom ïalehai” la ong u coach ka Real Madrid u Carlo Ancelotti ha ki nongthoh khubor.
“Ngi la ailad ïa ki jingshah thombor pyrshah, kam dei ka jingïalehkai kaba bha, ka la long ka jingïalehkai kaba shai bha ban ïohi ba ngi donkam ban ïada kham bha bad ban don ka jingïahap jingmut kaba kham bha ha madan.”
U Ancelotti u la jied ïa ka juh ka kynhun sdang kaba la pynliem ïa ka Atalanta ban rah ïa ka UEFA Super Cup ha ka sngi Balang, ha kaba u Jude Bellingham u don hapdeng madan hadien jong u Mbappe, u Vinicius Junior bad u Rodrygo.
U Mbappe u la thep kol ha katei ka jingjop hynrei une u rangïalehkai barim jong ka Paris Saint-Germain um shym la lah satia ban lehkmen ïa ka jingïakhun ba nyngkong jong u ha ka ri thymmai jong u namar um shym la lah ban thep kol.
