Jowai, Naitung 12
Ka kynhun ïalehkai na Jowai ka la rah ïa ka nam ‘Overall Champion’ ha ka lympung ïalehkai 3rd West Jaiñtia Hills District Level Wushu Championship 2026 ba la pynïaid da ka West Jaiñtia Hills District Wushu Association (WJHDWA).
Kane ka nam jop ka la wan hadien ba ka la lah ban khur haduh haduh 14 tylli ki takma ksiar ha ka sngi pynkut ïa kane ka lympung ïalehkai ha Chutwakhu Indoor Sports Hall-Auditorium, Jowai ha ka sngi Saitjaiñ.
Katba ka kynhun na ka shnong Mustem ka la wan ha ka kyrdan ba-ar da kaba khur 9 tylli ki takma ksiar bad balai la ïoh da ka Secondary School kaba la khur 7 tylli ki takma ksiar.
Ha kane ka lympung ïalehkai kaba ar sngi kynthih la wan ïashim bynta haduh 110 ngut ki nongïalehkai na ki skul bapher bapher ha kylleng kane ka District.
Napdeng kitei ki nongïashim bynta, ki don 63 ngut ki khynnah shynrang bad 47 ngut ki khynnah kynthei, kiba ïakhun ha ki ar tylli ki kyrdan ïalehkai kata ka Sanda bad Taolu.
Ka jingïakop Sanda ka kynthup ïa ki jingïalehkai ha ki rta bapher bapher naduh Sub-Junior, Junior bad Senior na ka bynta ki khynnah shynrang bad kynthei. Katba ka Taolu ka kynthup ïa ka jingpyni (demonstrate) da ki nongïaleh -kai kiba la mihkhmat ïa ka Jylla ha ki kyrdan bapher bapher jong ka ri.
Na ka jingbym lah ban ïadon lang u Myntri ka thad ïalehkai, u Eladmiki Suting ula shim ïa ka bynta kum u kongsan ban sam ïa ki khusnam sha ki nongïashim bynta ha ka jingdonlang u Working President ka WJDSA u Bah EMH. Passah kum u symbud kongsan bad u President ka Meghalaya Wushu Association Bah Donny Ranee nalor kiwei pat.
