Hyderabad, Nailar:
U Myntri khynnah jong ka sorkar kmie uba dei khmih ïa ka tnat korbar ri u Bandi Sanjay Kumar ha ka lah sngi U Blei u la pynshisha da kaba ong ba ka sorkar Congress ha ka jylla ym tang ba kam lah ban pyntreikam ei ei ha ki 6 tylli ki jingkular ba ka la khlei hynrei kam shym la lah ruh ha ka ban pynurlong ïa ka jingkular ban map ïa ka ram jong ki nongrep kiba dei ban ïoh jingkyrshan kumba la kular.
Ha ka jingïakren jong u bad ki nongthoh khubor hadien ka jingïashim bynta ha ka Raksha Bandhan and World Photography Day kaba la long ha Karimnagar, u nongïalam jong ka BJP u la ong: “Ka sorkar Congress ka la kular ban map ïa ka ram jong ki nongrep haduh T. 40,000 klur. Hynrei kumba ka leh ka la map tang T. 17,000 klur ka ram.”
“Ka sorkar Congress kam shym la lah ruh ban pynurlong ïa ki 6 tylli ki jingkular ba ka la buh ha ka por ilekshon. Ka la sangeh ha ka ban sumar bad ïarap ïa ki paidbah bad ïa ki nongrep,” u la ong. U Myntri shuh shuh u la ong, ba u la buh ka jingkyrpad ïa ka sorkar jylla ba ka la dei ban pyllait ïa ka um sha Karimnagar bad dawa ban pyntikna ha ka ban pyntreikam noh kyrkieh ïa kane. “Kane ka mat ba ïadei bad ka jingsam um ka la dei ban pyntreikam noh khlem da pynsahteng, khlem da ai ne buh kino kino ki daw ha kaba ïadei bad ka jingsam um,” u la bynrap.
Kum shi bynta ban kynthoh pyrshah ïa u heh nongïalam jong ka seng BRS u K Chandrashekar Rao, u Sanjay u la pynshisha da kaba ong ba u Myntri Rangbah barim u la ïasuhbuit sniew bad ki riewpawkhmat ka seng Congress ha Delhi bad ha kaba ïadei bad kane ka jingïadei kam jong ki, ka seng BRS ka la ai pisa ïa ka seng Congress, ha kaba nangne ka la mih ka mukotduma kaba long pyrshah ïa ka longïing jong u KCR ha kaba ïadei bad ka jingpyntreikam ïa ka Kaleshwaram Project, ka jingsngaptuh ïa ka jingïakren ha ka phone, ki kam ba ïadei bad u drok bad kiwei pat ki kam beaiñ.
