Shillong, Nailar 21
Ka Shillong Lajong FC ka la lah ban pynliem noh ïa ka Emami East Bengal da 2-1 kol na ka bynta ban jam sha ka semi final ha ka sien kaba nyngkong eh ha ka lympung ïalehkai 133rd IndianOil Durand Cup kaba la long ha ka sngi Balang ha Jawaharlal Nehru Stadium, Polo.
Kane ka nam jop ka la wan urlong lyngba ka kol kaba khatduh ba la thep da u rangïalehkai shongben u Figo Syndai hashwa ban kut ka jingïalehkai hadien ba kine ki kynhun ki la ïakhaid mar shi kol.
Kane ka jingïakhun ka la pynhun mynsiem ïa ki 15 hajar ngut ki nongkyrshan ka Shillong Lajong na ka bynta ban pyndap hi smam ïa ka stadium hi baroh kawei ha kaba katei ka kynhun ba khlaiñ bor na Kolkata kam shym la lah ban pynurlong ïa ka jingjop.
Ha kane ka jingïakhun quarter final, u coach ka East Bengal u Carles Cuadrat u la pynmih da ka kynhun kaba khlaiñ naduh kaba sdang da kaba pynïalehkai ïa u Dimitrios Diamantakos, Madih Talal bad u David Lalhlasanga ha ka bynta kaba shakhmat, katba u Saul Crespo bad u Jeakson Singh ha ka bynta kaba shapdeng.
Kumjuh u Jose Hevia u la pynmih da ka kynhun kaba khlaiñ bor ban pyni ïa ka mynsiem ïakhun hakhmat ki paidbah nongkyrshan. Kane ka kynhun ïalehkai ka nongbah ka la ïoh ban pynkhih jar nyngkong eh lyngba u rangïalehai shakhmat na Brazil u Marcos Rudwere Silva. Kane ka la wan lyngba u Hardy Cliff Nongbri, uba la ioh ban shut ïa ka corner bad u Rudwere um shym la pynlehnohei ïa kane ka kabu ksiar.
Kane ka shi kol ka la nangpynïoh mynsiem ïa ki rangïalehkai Lajong ba kin nangïakhun tyngeh shuh shuh. Watla ka East Bengal ka la pyrshah ban pynphai, hynrei kam shym la lah ban pynurlong haduh kaba kut jong ka kylla step.
Hadien katto katne por ka East Bengal ka la lah ban pynurlong lyngba u Nandhakumar Sekar. Kane ka la wan hadien ba u Vishnu u la ïoh ban pynbuh bol ïa u Nandhakumar, u bym shym la pynlehnohei ïa kane ka kabu ksiar kaba u la ïoh ha ka minit kaba 77 na ka bynta ban ïakhaid mar shi kol.
Da kane ka jingïakhaid ka la pynlong ïa kine ki kynhun ban ïakhun tyngeh na ka bynta ban ïoh thep kol. Dei ha ka minit kab 83 ba ka Lajong ka ïoh ban thep biang ïa ka kol kaba ar lyngba u Figo. Kane ka la wan urlong lyngba ka jingïarap lang u Wadajied uba la pynbuh bol ia u Rudwere ula shut beit beit ïa ka bol bad u Figo ula ïoh ban thep kol ha kaba ki rangïalehkai ‘dien ka East Bengal kim shym la lah ban khanglad na kane ka jingshah thep. Haduh kaba kut katei ka kynhun ïalehkai ISL na Kolkata kam shym la lah pynphai bad ka la mad ïa ka jingshah rem.
Lyngba kane ka jingjop, ka Lajong kan pynkhreh ïa ka jingïakhun semi final ha ka 25 tarik pyrshah ïa ka NorthEast United FC, kaba la jop ïa ka Indian Army FT da 2-0 kol. Kane ka jingïakhun kan long ha Vivekananda Yuba Bharati Krirangan, Kolkata. Katba ka final la buh ban pynlong ha ka 31 tarik mynta u bnai ha kajuh ka jaka.
