Shillong, Nailar 21
U Phil Foden, u rangïalehkai ba tbit tam jong ka Manchester City, u la shah pynkup burom da ka khusnam ba pawnam jong ka Professional Footballers’ Association Player of the Year ha ka sngi Ba-ar.
Ka jinglehkai ba kyrpang jong une u rangïalehkai ba dang 24 snem ka rta ha baroh kawei ka samoi ba la dep ka la long kaba kongsan bha ha ka jingjop ba phylla jong ka City ban ïoh ïa ka jingjop kaba saw sien pynbud ha ka Premier League kaba ym pat ju ïoh mynno mynno ruh.
Ki jingnoh synñiang jong u Foden ki long kiba kongsan bha na ka bynta ka kynhun ïalehkai jong u Pep Guardiola, namar ba u ju ai jingïalehkai man ka por ha madan.
Da ka jinglah ban thep haduh 19 kol bad ïarap pynbuh haduh 8 tylli, u Foden u la don ka bynta kaba kongsan ha ka jingïakhun kaba itynnad jong ka City pyrshah ïa ka Arsenal, kaba la pynkut noh da ka jingjop kaba phylla ha ka sngi ba khatduh na ka bynta katei ka klob jong ka City.
“Ban jop ïa kane ka khusnam ka dei kaei kaei kaba kyrpang bha bad ka dei kawei kaba nga sngew sarong bad sngewnguh shibun. Ban ithuh ha kane ka rukom da ki para nongtrei jong phi ka mut baroh bad nga kwah ban ai khublei ia baroh kiba la jied ïa nga,” la pynpaw u Foden.
“Nga kwah ruh ban ai khublei kyrpang ïa u Pep, ki coach jong ka City bad baroh ki paralok jong nga namar ki ïarap ïa nga ban pyrshang bad ban nangkham bha man la ka sngi.”
U Foden u la pynpaw ïa ka jingangnud jong u ban rah ïa ka nam lahduh ba phra sien kynthih ha ka Premier League hadien ba ka kynhun ka la jop da 2-0 kol pyrshah ïa ka Chelsea ha ka jingïalehkai ba nyngkong jong kane ka samoi ïalehkai ha ka sngi U Blei.
“Ka samoi ba la dep ka dei kawei pat kaba kyrpang bha na ka bynta baroh ha ka klob, hynrei mynta baroh ki jingpyrkhat jong ngi ki long tang ha kaba pyrshang ban ïoh ïa ka jingjop kaba kham bun ha kane ka samoi,” u la ong.
Ka jingïalehkai ba kyrpang jong u Foden ha baroh kawei ka samoi ïalehkai 2023-24 ka la pynlong ruh ïa u ban ïoh ïa ka khusnam kum u nongïalehkai ba pawnam jong ka Premier League. Ki jingnoh synniang ba radbah jong u ha madan ki la pynlong ruh ïa u ban ïoh ia ka jingithuh kum u rangïalehkai kynsai.
Na ka liang u Txiki Begiristain, uba long u director jong ka Football ha ka Manchester City, u la pynpaw ïa ka jingkmen jong ka klob halor kane ka jingjop jong u Foden, da kaba ong: “Baroh hangne ki sngewkmen haduh katta katta ban ïohi ïa u Phil ba un jop ïa kane ka khusnam. U Phil u pynpaw ïa baroh kaba ngi ïeng na ka bynta jong ka Manchester City. U dei u nongïalehkai uba tbit bha hynrei u dei u briew uba ju ïaleh ha ryngkat ka jingtrei shitom.”
