Shillong, Nailar 22
Ka Mawkriah West SC ka la pynliem noh ïa ka Lumdiengjri SC da 5-1 kol na ka bynta ban khur ïa ka jingjop kaba nyngkong ha ka lympung ïalehkai Third Division Football League 2024 ba la pynïaid da ka Shillong Sports Association ha ka sngi Palei.
Ha kane ka jingïakhun jong ka Group-C baroh ar ki kynhun ki la ïakhun tyngeh naduh kaba sdang, hynrei kim shym la lah ban pynkhih jar. Dei ha ka minit kaba 44 ba ka Lumdiengjri ka la ïoh ban pynkhih jar nyngkong eh lyngba u Desilva Pyngrope.
Hadien katto katne por ki rangïalehkai ka Mawkriah West ki la ïakhun tyngeh ha kaba ka la ïoh ban pynphai kylla lyngba u Jeremy Nongbri ha ka minit kaba 58 na ka bynta ban ïakhaid mar shi kol.
Kane ka kynhun ka la pynbud biang ïa ka kol kaba ar ha ka minit kaba 66 lyngba u Ronald Lyngdoh, kumjuh ïa ka kol kaba lai la thep da u lyngba u Honour Nongbri (73). Ïa ka kol kaba saw la thep da u Hosterfield Kharbudnah (88) bad khatduh eh da u Saiñkupar Sun (90+1) na ka bynta ban khur syndon ïa ka jingjop.
Haba phai sha kawei pat ka jingïakhun jong ka Group-D, ka Rynjah SC ka la ïasam mar shi point bad ka Mawshbuit SC hadien ba ki la ïakhaid mar 2-2 kol.
Ha kane ka jingïakhun ka Rynjah ka la pynkhih jar nyngkong eh lyngba u Lalduhawna Caawgwthu ha ka mint kaba 19 bad ïa kawei pat la thep da u Paosagun Khongsai (22). Na ka liang ka Mawshbuit ka la lah ban pynphai kylla ha ka kylla miet lyngba u Lurshai Wankhar ha ka minit ba 48 bad kawei pat la thep da u Jayden Langstang (66) na ka bynta ban ïakhaid mar ar kol.
Kane ka lympung kan bteng biang ha ka sngi Thohdieng ha kaba ka Tynring SC kan ïakhun pyrshah ïa ka Lamlynti SC ha ka por 12:45, katba ka Kharang SC ïa ka Mawryngkneng SC ha ka por 3:45 janmiet.
