New Delhi, Nailar:
Uwei u khynnah 5 snem ka rta ha Utah, u la siat iap ialade da ka suloi kaba u la lap na ka iingsah jong u katba u dang ïalehkai ha kamra thiah jong ki kmie- ki kpa bad kane ka la jia ha ka 22 tarik u nailar, ha kaba utei u khynnah uba la ithuh kum u Brooks Thomas Wilson, u la lap ïa ka suloi 9mm ba la thep kuli lypa bad kaba sngewsih ka long ba katei ka suloi ka la bthei kynsan katba u dang rah ia ka shajrong bad u la kum khñiot ia u jingñion ha katei ka suloi, kaba la leit dei na ki bynta jong ka khlieh jong u bad u la mynsaw jur haduh ba ki doktor kim shym lah shuh ban iarap ne ban ai jingsumar ia u.
La ong ba ka kmie bad u kpa jong utei u khynnah, u Bryan bad ka Kristin Wilson ki don hi hapoh iing ha katei ka por ba katei ka jingjia ka la jia bad kumta ki la leit ban mareh mar-mar sha katei ka kamra thiah hadien ba ki la iohsngew ia ka jingsawa jong ka suloi na katei ka kamra.
U heh ka tnat pulit na Santaquin, u Mike Wall, u la ong ba kane ka jingshah siat ka paw ba ka dei kaba shu jia ryngkhat bad ym shym la don kano- kano ka jingsuba ban mano- mano ba thmu sniew ne ba don kti halor katei ka jingiap jong utei u khynnah rit.
