Washington, Naitung:
U nongthaw aiñ barim jong ka Brazil, u Eduardo Bolsonaro, uba dei u khun jong u President barim katei ka ri – u Jair Bolsonaro bad uba dei ruh u paralok jong u President Donald Trump jong ka America, ha kane ka sien, u la ïathuh ha ki nongthoh khubor ba u la ïoh ïa ka kot shong sah ba pura ‘Green Card’ ban shong duh ha US, wat hadien ki katto katne ki jingpyrkhing ba jwat jong ka sorkar u Trump.
U Bolsonaro uba kham rit, uba la sah ha US naduh ba sdang jong u snem 2025 bad dang shen la shah rai phatok ha la ka jong ka ri, u la ong lyngba ka phone ba la ai ïa ka jingsah hapoh ka kyrdan EB-1A, na ka bynta ki briew shimet kiba don ïa ki sap ba phylla ha ki bynta kum ka science, ka arts, ka kam khaii bad ki jingialehkai.
Ka jingpyntreikam, u la ong, ka la sdang kumba shisnem mynshwa. U Bolsonaro u la pynroi ïa ka jingïadei bad ki riew pawkhmat jong ka US bad ka sorkar Trump.
U la shah kynnoh ba u la pynkhih pyrshah ïa ka jingshah rai pynrem jong u kpa jongu ha Brazil namar ba u la pyrshang ban pynkylla ïa ka result jong ka elekshon 2022, ha kaba u rangbah Bolsonaro u la shah rem ha u President Luiz Inacio Lula da Silva.
Une u president barim u la shah rai phatok palat 27 snem namar ka jingthmu ban pynkhih bor da ki shipai.
U Eduardo Bol-sonaro u la ong ba u kynriah na ka bynta ban iada ialade na kaei kaba u khot ka jingshah pynshitom bein khlem akor ha ka Supreme Court jong ka Brazil, ym ban iarap ïa u kpa jongu. Ha u bnai Jymmang, ka ïingbishar, ka la rai pynrem ïa u Eduardo Bolsonaro, da kaba set phatok saw snem bad ar bnai, hadien ba ka la lap ba u donkti, ha kaba u la pan jingtuklar ïa ka US, ha ka jingbishar jong u kpa jongu.
Ki nongpyrshah saiñ hima sima jong u Eduardo bad u hynmen jong u, u Senator Flavio Bolsonaro uba don ka jingkyrmen ban long president, ki la kynnoh ba kitei ki hynmen ki trei pyrshah ïa ka Brazil ha US, kaba ki nongkynthoh ki ong ba ka lah ban wanrah ïa ka jingbuh khajna jong ka U.S. ïa ki katto katne ki mar jong ka Brazil.
Ka dor kaba 25% halor ki mar ba la jied na Brazil kan treikam ha ka sngi thohdieng. Baroh arngut, u Eduardo bad u Flavio Bolsonaro, ki la kyntait ba ki la pan na ka sorkar Trump, ba kan buh khajna, halor ki mar ba shalan shabar ri jong ka Brazil.
U Eduardo Bol-sonaro, uba la don lypa ka jingbit ban trei ha US, shuwa ba un ioh ïa ka green card, ula ong ba un leit phai biang sha Brazil tang lada ioh ïa ka jingmap ei.
