Cuban, Naitung:
U President jong ka Cuba, u Miguel Diaz-Canel, ha ka Sngi U Blei, u la pynrem ïa ka jingpynbor jong ka US, pyrshah ïa ka ri jong u, kum ka “aiñ pyniap pathar”, da kaba kynnoh ba ka America, ka thmu ban “shim kabu” ïa katei ka dew lynnong.
Halor ka jingkhang khyrdep kaba la neh da ki phew snem, ka ri America hapoh ka jingsynshar jong u President Donald Trump ka la pynjur shuh-shuh ïa ka jingpynbor ha kine ki bnai ba la dep ïa ka ri ba marjan jongka kaba don ha ka thaiñ Shatei Lam Mihngi, da kaba pynjari ïa ka jingkhang umphniang kaba treikam bha bad ki jingpynjari kiba tyngeh.
Katei ka jingpynbna ka long hadien ba ki shipai jong ka US ki la pynhap noh ïa u President ka Venezuela, u Nicolas Maduro ha u Kyllalyngkot, da kaba weng noh ïa u paralok ba kongsan jong ka jingialam komunist jong ka Cuba bad ka jingpynpoi umphniang kaba iaid beit.
Ki sienjam ki la pynlong ïa ka jinghiar kaba jur ha ka kam jngohkai pyrthei, ka jingmih noh jong ki kompeni bar ri kiba bun bad ka jingkhriat jong ka jingwan ki pisa bar ri. Ka America, ka pynskhem ba ka Cuba, kaba dei ka paralok jong ka Russia bad China, ka buh jingma ïa ka jingshngain jong katei ka thaiñ bad ka pynkhein ïa ka hok jong ki nongshong shnong jong ka.
Ki jingpynjari ba dang shen jong ka US, kiba la pynbna ha ka Sngi Palei, ki thew ïa ka prokram ai jingsumar shabar ri jong ka Cuba, kawei na ki lad kamai ba kongsan jong ka ri.
U Diaz-Canel, u la leit ban iashim bynta ha ka jingrakhe ïa ka jingdap 73 snem jong ka jingshah hiar thma jong ka Moncada barracks ha u snem 1953, kaba la ialam da u Fidel Castro, kaba la shim ba ka dei ka jingsdang jong ka Cuba Revolution.
Ka jingeh ha ka liang ka bording ha katei ka dew lynnong kaba don 9.4 million ngut ki briew ka la wanrah ïa ki katto katne ki jingduh bording ha ka ri baroh kawei kaba teng teng ka la neh haduh 30 kynta ha ka nongbah bad katto katne sngi ha ki jylla. Namar ka jingbym sngewhun halor kitei kiba bun ki jingeh, u Diaz-Canel ha ka Sngi U Blei u la khot lang ïa baroh na ka bynta ka “jingiatylli” bad u la pynpaw ïa ka “jingpyntreikam ïa ki jingkylla ha ka ioh- ka kot bad ka imlang- sahlang.”
Ka sorkar Cuba ha u bnai Jylliew ka la pynbor ïa ka kynhun jong ki jingpynkylla kiba kongsan ha ka iew laitluid hynrei ka la ju ong ba ka rukom saiñ pyrthei jong ka kam dei ban iakren bad ka la kular ban pyrshah ïa kano kano ka jinghiar thma jong ki shipai.
