Beijing, Naitung:
Ka jingshlei um kaba la wanrah da u slap uba jur ka la lynshop ïa kawei ka jaka jngohkai pyrthei ha ka thaiñ Shatei Lam Mihngi jong ka China ha ka Sngi U Blei, ha kaba 10 ngut ki la duh ei noh ïa ka jingim jongki bad 23 ngut kiba la shah ktah bad mynsaw, ong ka khubor jong ki lad pathai khubor jong ka jylla.
Ka kaiphod ba kham mynshwa jong ka CCTV ka la pyni ba ka jaka ba la jia ka jingshlei um ka dei ka Shuangshimen Scenic Area ha ki jaka ba jyrngam bad ki lum jong ka Gansu ba shathie kaba jngai kumba 1,200 kilomitar (745 mer) na ka phang Shathie Lam Mihngi jong ka nongbah Beijing.
Ka Shuangshimen ka pawnam na ka bynta ki kynroh maw ba kynja mariang, ki khlaw alpine bad ki wahduid lum. Ka dei ka jaka ba pawnam bha ha ka por lyiur.
” Ia kiba mynsaw la rah noh sha ki jakasumar bapher baka bynta ki jingsumar ba kyrkieh bad ki la ioh ruh ban pyllait im sa 174 ngut kiba shah ktah ha katei ka jingjia,” la ong ka CCTV.
Ki thaiñ jong ka thaiñ Shatei Lam Mihngi jong ka China ki don ha ka jingpynkhreh kaba jur bha na ka bynta ka jingshlei um ha ka Sngi U Blei hadien ba ka ‘eriong Noul kaba la leit lynshop ïa katei ka thaiñ ha ka por mynstep.
Shuh- shuh ruh la ong ba ki bynta jong ka Gansu, kiba kham pajih na ka lynti jong ka Noul ruh ki la mad ïa u slap uba jur bha ha ka Sngi U Blei, ha kaba ki bor pyniaid shnong ha kylleng ka nongbah ki la pynmih ïa ki jingpynbna halor ka jingsniew jong ka suiñbneng.
