Kyiv, Nailar:
Ki shipai ka Russia ha ka Sngi Nyngkong ki la leit ban siat pynjulor bad ther bom dusmon biang sha ki thaiñ ba don ki shlem pynmih bor-ding jong ka Ukraine bad la ong ba kane ka la pynthud ia ki kam- ki jam ka Ukraine bad ka la wanrah jingeh ruh ia ki paidbah nongshong shnong ka Ukraine kumba long ha ki snem ba la leit, ha kaba kitei ki shlem ki la julor bad ki paidbah Ukraine ki la hap ban shong dum bad shong tyrkhong khamtam eh ha kum kane ka juk ba kiei- kiei baroh ki treikam lyngba ka bor-ding.
Ha katei ka step, la ong ba ki shipai ka Russia ki la leit hiar thma tyngeh biang ia ka Israel da ki tiar kiba kham khlaiñ bor shuh-shuh bad la ong ba ka Russia ha kane ka sien, ka la phah ia ki shipai jongka ban leit ther bom bad pyn julor ruh ia ki liengsuiñ bym don briew kiba don hajan kitei ki shlem bor-ding ka Ukraine.
Kumta, la ong ba ka tnat ïada jong ka Ukraine ka la iathuh ba ha katei ka jingleit thombor ba kyndit jong ka Russia, 2 tylli ki Electornic Warfare Station bad 4 tylli ki Field Ammunition ki la shah pynjulor hapoh jong kitei ki 24 kynta ba la leit.
Ha kajuh ka por, u President ka Ukraine, u Volodymyr Zelensky, ula ong ha ka sngi Nyngkong ha ka jingthoh jong u lyngba ka Telegram, ba ka Russia ka la ther palat 100 tylli ki ‘namding kiba bun jait bad kumba 100 tylli ki drone bad kumta ruh u la ong ba kane ka long ka jingleit hiar thma kaba shyrkhei bad ba jur tam jong ka Russia ha kane ka sien hiar thma kaba khlem poi pyrkhat bad ba ka Ukraine kam shym la pynkhreh eiei.
U Zelensky u la ong ba kane ka jingshah thombor ka la wanrah ia ka jingjulor kaba khraw ha ka liang ka tnat pynmih bor ding, hynrei mynta la pynbha pat ia ki jingdonkam katkum ka jinglah bad jingstad jong ki tnat ba dei khmih bad baroh kiei- kiei ki la iaid beit bad treikam biang kumba ju long.
Katkum ka jingïathuh jong ki shipai suiñ ka Ukraine, la ong ba ka Russia ka la siat bun tylli ki ‘namding bad kumjuh ruh da kaba leit thombor da ki drone kiba ka la buh kyrpang ban leit thombor ha katei ka sngi khlem da ai dak ne pynpaw dak eiei khnang ba kan long ka jing pynkyndit ia ka Ukraine bad ka long ruh ka jingshim kabu kaba shyrkhei naba ka Ukraine kam pat shym la pynkhreh eiei ban ialeh pyrshah ne ban ïada ialade na kitei ki jinghiar thma biang jong ka Russia ha kane ka por.
Watla katta, la ong ba ka Ukraine bad ki paidbah ka Ukraine, ki la dep tip lypa ba ka Russia ka dang pyn-ap ban leit hiar thma jur biang ia ka Ukraine namar kumba la iohi ia ka jinglong- jingman hapdeng ka Russia bad Ukraine, ka Russia bad ka Ukraine ruh kim pat lah ban poi sha ka lad jingiasuk namar ka Ukraine ruh kam treh ban pyndem bad ka Russia ruh kam shym kwah ban sangeh noh ia ka thma.
