UAE, Risaw:
Ka jingkhaïi bym dei umphniang hapdeng ka UAE bad ka India, ka la kiew haduh 50% ha ki lai snem, ha kaba la palat ïa ka $76 billion ha u snem 2025, la ong u myntri ka tnat ka ioh ka kot jong ka UAE, u Abdulla Bin Touq Al Marri ha ka jingïalang jong ka NDTV World Summit.
U Myntri u la ai khublei ïa ka soskular ba la soi da ki ar tylli ki ri ha u Rymphang jong u snem 2022, kaba la kyntiew ïa ka khaii pateng bad pynskhem ïa ka jingiadei ha ka ioh ka kot.
Haba ai jingkren ha ka jingialang ha New Delhi, u Al Marri u la ong ba ka jingiatreilang ka la long kaba kham kongsan namar ba ka jinglong jingman jong ka ioh ka kot ha ka pyrthei ka iakynduh ïa ka jingbym thikna kaba nang jur.
“Bun na ki jingmut kiba pynwan dur ïa ka ioh ka kot jong ka pyrthei na ka bynta kawei ka pateng mynta ki shah kylli jingkylli,” u la ong.
Haba pynpaw ïa ka jingkiew ha ka jingïadei ha ka liang ka ioh ka kot, u Al Marri u la ong ba ka jingkhaii bym dei umphniang hapdeng ka India bad ka UAE ka la kiew na ka $51 billion ha u snem ba nyngkong jong ka jingïateh kular sha palat $76 billion ha u snem 2025.
U la ong ba ka jingkhaii pateng hapdeng ki arliang mamla ka la palat ïa ka $101 billion ha u snem mang tyngka ba la dep jong ka India.
Kine ki ar tylli ki ri ki la buh thong ban rah ïa ka khaii pateng hapdeng ki ri sha ka $200 billion ha u snem 2030.
“Ka jingiateh ka dei ka engine kaba pynkhih ïa ngi shakhmat, ym ka steshon ha kaba ngi sangeh,” la ong u myntri.
U Al Marri, uba la soi ïa kane ka jingïateh kular ryngkat bad u myntri ka tnat khaii pateng jong ka India, u Piyush Goyal, u la ong ba kane ka jingïatreilang ka la nang kiew palat ïa ka khaii pateng ban kynthup ïa ka jingbei tyngka, ka jingpynpoi marbam, ka bor ding, ka karkhana, ka jingpynbiang bam bad ka teknoloji ba kham shajrong.
