Washington, Risaw:
U Director barim jong ka FBI, u James Comey, u la shah kynnoh ba u la sam tuh ïa ki jingtip jong ka tnat ïada ri, kaba dei ka mukotduma kaba lai kaba la mudui pyrshah ïa u nongkynthoh ba paw pyrthei jong u Donald Trump, u President jong ka US.
Ha ka ejahar ba la muduie ha ka Sngi Nyngkong, la kynnoh ba u Comey u la phah ïa ki jingtip ba sop-sop ha u Risaw 2016, ha ka por ba u dang long u khlieh jong ka tnat tohkit jong ka sorkar pdeng bad ïa kitei ki jingtip ba kyrpang la phah sha u briew u bym don hok ban ioh ïa ki.
U Comey u la shah pharep ruh ha u Nailur 2025 halor ka jingkren lamler sha ka Congress bad khanglad ïa ka jingïaid lynti jong ka Congress ha kaei kaba la ïohi paidbah kum ka jingsiew kylliang da u President ka Republican pyrshah ïa u nongïaleh pyrshah saiñpyrthei.
U nongbishar jong ka sorkar pdeng u la wanrah noh ïa katei ka mukotduma halor ka nongrim ba u nongiasaid aiñ jong ka US, uba la jied da u Trump, uba la wanrah ïa katei ka jingshah kynnoh u dei uba ki shu thung kam be-aiñ.
U Comey, u la shah kynnoh biang ha u Iaiong ruh namar ba u la byrngem ban buh jingma ïa ka jingim jong u Trump, lyngba ka jingthoh jong u hapoh ka rynsan paidbah ka ‘Instagram’, kaba pyni ïa ki nombar “86 47” ba la pynwandur da ki mat-tah um ‘sea shells’.
Ka Justice Department jong ka sorkar Trump, ka la shim ba katei ka dak “86 47” ka long ka jingma ïa u President, “86” ka mut ban pynïap bad “47” ka long ka jingkdew ba u Trump u dei u president ba 47.
Hynrei hadien kata, u Comey u la kyntait ba u la byrngem ban buh jingma ïa ka jingim jong u President.
Ha ka mukotduma kaba khatduh, la kynnoh ba u Comey u la bthah ïa u briew bym don jingithuh ban “pynpaw ïa ki jingtip jong ka kam ïada ri sha u nongthoh khubor na ka bynta ka jingpynmih khubor jong ka ri.”
Ha ka jingpynbna sha ki lad pathai khubor jong ka US, u nongiasaid aiñ jong u Comey, u Patrick Fitzgerald, u la ong ba ïa ki jingkynnoh ha kane ka mukotduma ba khatduh la tohkit da ki nongmudui ha ka por jong ka jingsynshar ba nyngkong jong u Trump bad “ka Sorkar ka la rai ba ym dei ban pynngat mukotduma pyrshah iano-iano ruh.”
